«Xalıqtı sociallıq qorǵaw sistemasın qarjılandırıw tártip-qaǵıydaların jetilistiriw haqqında»ǵı Prezident Pármanı (PP-17-sanlı) qabıl etildi.

Pármanǵa bola, 2025-jıl 1-aprelden:
«Sociallıq dápterler» qorları arqalı kórsetiletuǵın sociallıq járdemler Kámbaǵal shańaraqlar reestrine kirgizilgen shańaraqlarǵa, turaq jay sharayatların jaqsılaw hám densawlıqtı saqlaw boyınsha sociallıq járdemler bolsa –aylıq dáramatı shańaraq aǵzalarınıń hár birine minimal tutınıw qárejetleri muǵdarınıń 2 esesinen kóp bolmaǵan shańaraqlarǵa da beriledi.
Onda mádeniy-aǵartıwshılıq, bilimlendiriw, sport hám turizm ilajların shólkemlestiriw hám ótkeriwge «Hayal-qızlar dápteri» hám «Jaslar dápteri» qorları túsimleriniń 25 procentinen kóp bolmaǵan bólegin beriwge ruqsat beriledi;
«Sociallıq dápterler» qorları arqalı sociallıq járdemler tómendegi tártipte kórsetiledi:
– shańaraqlardı kámbaǵallıqtan shıǵarıw boyınsha individual rejede kámbaǵal shańaraqlardıń jasları hám hayal-qızlarına belgili bir sociallıq járdemlerdiń belgileniwi usı kategoriyadaǵı shaxslardan qosımsha múrájat talap etpegen halda «Sociallıq dápterler» qorları esabınan sociallıq járdemler kórsetiliwine tiykar boladı;
– «Sociallıq dápterler» qorları esabınan sociallıq járdem kórsetiwdi sorap múrájat etken shaxslardıń sociallıq jaǵdayın anıqlaw «Birden-bir milliy sociallıq qorǵaw» málimleme sisteması arqalı, shańaraqtıń qarjılay jaǵdayın bolsa uyımlararalıq málimleme almasıw arqalı avtomat túrde bahalaw (skoring) nátiyjelerine muwapıq ámelge asırıladı, dep málimleme beredi xabar.uz saytı.

Qaraqalpaqstan xabar agentligi