Shomanay rayonındaǵı jaslar arasınan joqarı oqıw orınların pitkergenlerin Xorezm wálayatına jumısqa ornalastırıw, olardıń biznes baslamaların qollap-quwatlaw maqsetinde áhmiyetli ushırasıw bolıp ótti.

Ushırasıw Xorezm wálayatı hákimligi, Qaraqalpaqstan Respublikası Mámleketlik xızmetti rawajlandırıw agentligi hám Shomanay rayonı hákimligi menen birgelikte ótkerildi.
Ushırasıwǵa rayon hákiminiń orınbasarı A.Bekmuratov, rayondaǵı jumıssız jaslar, Xorezm wálayatı hákiminiń orınbasarı S.Salaev hám Xorezm wálayatı hákimliginiń juwapker xızmetkerleri videokonferenc baylanıs arqalı qatnastı.
Ushırasıwda Xorezm wálayatındaǵı bos jumıs orınları, jaslar ushın jaratılǵan imkaniyatlar haqqında tolıq maǵlıwmatlar berildi.
Sonday-aq, Shomanay rayonında arnawlı “Bos jumıs orınları miynet yarmarkaları”n ótkeriw, biznes baslamaların, startapların, ideyaların hám joybarların ámelge asırıw ushın jaslardı miynet bazarında talap joqarı bolǵan qánigelikler hám biznes júrgiziw kónlikpelerine oqıtıw máseleleri talqılandı.
Xorezm wálayatı hákiminiń orınbasarı S.Salaev rayon jasları menen sáwbetlesip, olardıń pikir-usınısların hám múrájatlerin tıńladı. Bul ushırasıw shomanaylı jaslar ushın óz keleshegin rejelestiriw, jumısqa ornalasıw imkaniyatların keńeytiw, biznes baslamaların ámelge asırıw ushın áhmiyetli ilaj boldı.
Ushırasıwda jaslar jumısqa ornalasıw imkaniyatları, biznesti rawajlandırıwǵa, qollap-quwatlawǵa arnalǵan baǵdarlamalar haqqında maǵlıwmatlarǵa iye bolıp, ózlerin qızıqtırǵan sorawlarǵa juwap aldı.

Qaraqalpaqstan xabar agentligi.