Keshe Evropanıń bir neshe qalalarında futbol boyınsha Evropa chempionlar ligasınıń 1/16 final basqısh oyınları bolıp ótti.
Ásirese, usı basqıshta Angliyada ótkerilgen «Manchester Siti» hám Madridtiń «Real» klubları arasındaǵı oyın oǵada qızıqlı ótti.
Ushırasıwdıń birinshi taymı angliyalı futbolshılardıń ústinligi astında ótti hám oyınnıń 19-minutında «Manchester Siti» diń norvegiyalı hújimshisi Еrling Xoland Yoshko Gvardiol tárepinen ózine ájayıp tárizde jetkerilip berilgen pastı «Real» dárwazasına anıq jollawǵa eristi.
Ekinshi taymda Karlo Anchelotti shákirtleri bir qatar qáwipli hújimler shólkemlestirdi hám oyınnıń 60-minutında usınday hújimlerdiń birin «Real» hújimshisi Kilian Mbappe nátiyjeli juwmaqlawǵa miyasar boldı.
Bunnan soń eki komanda da izbe-iz hújimler shólkemlestirip, futbol jankúyerlerin qáweterde uslap turdı. Oyınnıń 79-minutında «Real» futbolshıları angliyalı Fil Fodendi qopallıq penen toqtatıp qaldı hám bul ushın oyın tóreshisi tárepinen penalti belgilendi. Penaltidi bolsa, «Siti» hújimshisi Xoland anıq ámelge asırıp, Chempionlar ligasındaǵı óziniń 48-oyınındaǵı 49-golın urıwǵa miyasar boldı.
Ushırasıw sońında eki komanda da bir qatar oyınshılardı maydanǵa túsirdi hám bul ózgerisler «Real» ushın paydalı boldı. Atap aytqanda, 85-minutta oyınǵa qosılǵan Braim Dias aradan bir minut ótiwden «Manchester Siti» dárwazasına gol urıp, esaptı teńlestiriwge eristi.
Barlıq futbol jankúyerleri oyın usı esap penen juwmaqlanadı dep turǵanında, Madrid klubı aǵzaları 90+2 minutta jáne bir gol urıp, óz ıqlasbentlerin sheksiz quwanıshqa bóledi. Gol avtorı Djud Bellingem.
Tilekke qarsı, bul oyında Xosep Gvardiola ózbekstanlı Abduqodir Xusanovtı oyınǵa túsirmedi.
Sonday-aq, usı kúni ótkerilgen oyınlarda Lisabonnıń «Sporting»i Dortumundtıń «Borussiya»sına, «Brest» «PSJ»ǵa 0:3,esaplarında jeńilip qalǵan bolsa, «Yuventus» Еynxovenniń «PSV» klubın 2:1 esabında jeńiwge eristi.
Endi bul klublardıń juwap oyınları 19-fevral kúni bolıp ótedi.

Adilbay Orazov,
Qaraqalpaqstan xabar agentligi sholıwshısı