2024-jıldıń 1-aprel kúni Ózbekstan Respublikası Prezidentiniń «Qánigelestirilgen mektepler tarmaǵın keńeytiw hám olardıń jumısın bunnan bılay da jetilistiriw ilajları haqqında»ǵı pármanı qabıl etilgen edi. Usı párman tiykarında 2024-2025-oqıw jılınan baslap qánigelestirilgen bilimlendiriw agentligi sistemasındaǵı mekteplerde oqıwshılardı Watansúyiwshilik ruwxında tárbiyalawdıń jańa sistemasın engiziw maqsetinde, 5−8-klasslarda Ámir Temur, Jalaliddin Manguberdi, Zahiriddin Muhammed Baburday ullı sárkardalarımızdıń ibratlı ómirin búgingi áskeriy xızmetkerlerimizdiń mártligi menen baylanıstırıw, Watan qorǵawshısı kónlikpelerin qáliplestiriwge baǵdarlanǵan, 9−11-klasslarda áskeriy oyınlar hám sport jarısların ótkeriw belgilengen edi.
Usı pármannıń orınlanıwın támiyinlew maqsetinde, Nókis qalasında respublikamızda jaylasqan qánigelestirilgen mektepler oqıwshıları arasında «Turan jolbarısları» áskeriy-sport jarısınıń Qaraqalpaqstan Respublikalıq basqıshı bolıp ótti.
Onda oqıwshılar jarısta belgilengen shártler boyınsha óz-ara bellesip, onıń juwmaǵında Ibrayım Yusupov atındaǵı dóretiwshilik mektebiniń «Lashınlar» komandası birinshi orındı iyelewge eristi hám Tashkent qalasında ótkeriletuǵın jarıstıń juwmaqlawshı basqıshına jollamanı qolǵa kirgizdi.
Al, ekinshi hám úshinshi orınlardı Qaraózek rayonlıq qánigelestirilgen mektebiniń «Tebrenbes» hám Nókis qalasındaǵı Prezident mektebiniń «Vatanparvar» komandaları iyelewge eristi.
Jarıs juwmaǵında jeńimpaz hám sıylı orın iyeleri múnásip sıylıqlandı.

Adilbay Orazov,
Qaraqalpaqstan xabar agentligi sholıwshısı