Berdaq atındaǵı Qaraqalpaq mámleketlik universitetinde ruwxıylıq hám aǵartıwshılıq tarawı xızmetkerleri, jaslar menen islesiw boyınsha dekan orınbasarları, pedagog-tárbiyashılar hám tyutorlardıń qatnasıwında oqıw-seminarı shólkemlestirildi.

Onda Qaraqalpaqstan Respublikası Ruwxıylıq hám aǵartıwshılıq orayınıń baslıǵı T.Atamuratov, oraydıń úgit-násiyat toparınıń aǵzası, Nókis mámleketlik pedagogikalıq institutınıń docenti Q.Mambetovlar óz bayanatları menen qatnastı.
Ilajdı universitettiń Jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov alıp bardı.
Seminarda “Milletleraralıq tatıwlıqtı bekkemlew hám diniy keńpeyillikti támiyinlew” hám «Bir bolsaq – bir xalıqpız, birlessek – Watanbız!» ilajların úgit-násiyatlaw boyınsha maǵlıwmatlar berilip, áhmiyetine keńnen toqtap ótildi.
Bayanatshılar mámleketimizde túrli millet wákilleriniń tatıw jasawı, diniy keńpeyillik principlerine ámel etiliwi jámiyettiń turaqlılıǵı hám rawajlanıwınıń áhmiyetli faktorlarınan biri ekenin atap ótti.
Sonday-aq, bayanatlarda student-jaslar arasında milliy qádiriyatlardı úgit-násiyatlaw, olardıń ideologiyalıq immunitetin bekkemlew hám hár qıylı unamsız tásirlerge qarsı gúresiw máselelerine ayrıqsha itibar qaratıldı.
Seminarda qatnasıwshılar óz pikir-usınısların bildirip, tema boyınsha óz-ara pikir alıstı.
Bunday ilajlar ruwxıy-aǵartıwshılıq baǵdarındaǵı jumıslardı jáne de jedellestiriw, student-jaslardıń dúnyaǵa kózqarasın keńeytiw hám olardı jat ideyalardan qorǵaw baǵdarında úlken áhmiyetke iye.
Qatnasıwshılar ózlerin qızıqtırǵan sorawlarǵa juwap aldı.

Qaraqalpaqstan xabar agentligi.