Ózbekstan Sawda-sanaat palatası Qaraqalpaqstan Respublikası basqarması hám Qaraqalpaqstan Respublikası sudı tárepinen «Dawlardı sheshiwdiń alternativ usılları sıpatında tóreshilik sudları hám mediaciya» atamasında ámeliy oqıw-seminarı shólkemlestirildi.

Ilajda Qaraqalpaqstan Respublikasındaǵı ekonomikalıq hám puqaralıq isleri boyınsha sudlardıń sudyaları, mámleketlik uyımlar, kommerciyalıq banklerdiń basshıları hám yuristleri, sonday-aq, isbilermenlik subyektleri wákilleri katnastı.
Ilajda dáslep, basqarma baslıǵınıń orınbasarı A.Seytaxov shıǵıp sóylep, dawlardı sheshiwde mediaciyanıń ornı hám áhmiyeti, sonday-aq, 2024-jıl dawamında Sawda-sanaat palatası Qaraqalpaqstan Respublikası basqarması tárepinen sudlarǵa kirgizilgen dawa arzalar, erisilgen mediaciyalıq kelisimler boyınsha tolıq maǵlıwmat berdi.
Sonıń menen birge, dawlardı sheshiwdiń jáne bir alternativ usılı bolǵan Tóreshilik sudlarınıń mámleketlik sudlardan ayırmashılıq tárepleri haqqında keń túrde túsinik berip ótti.
Seminar dawamında Qaraqalpaqstan Respublikası sudı baslıǵı K.Tarixov tóreshilik hám puqaralıq sudlarda mediaciyalıq kelisim dúziwdiń tártibi, sud ámeliyatı, kelisim pitimi hám bul baǵdarda sırt el tájiriybeleri haqqında maǵlıwmat berdi.
Ilajda qatnasıwshılar ózlerin qızıqtırǵan sorawlarǵa juwap aldı.

Qaraqalpaqstan xabar agentligi.