Múnásibet

Ózbekstan Respublikası Ministrler Kabinetiniӊ 2025-jıl
22-yanvardaǵı “Topıraq monitoringin ámelge asırıw hám topıraqtıӊ ónimdarlı qatlamın anıqlaw tártibin jetilistiriw ilajları haqqında»ǵı qararı qabıl etildi.
Usı qararǵa muwapıq, Ózbekstan Respublikasınıӊ «Topıraqtı qorǵaw hám onıń ónimdarlıǵın arttırıw haqqında»ǵı Nızamına muwapıq, sonıń menen birge, respublikada klimat ózgeriwi menen baylanıslı unamsız təsirlerdiń aldın alıw, awıl xojalıǵı jerleri degradaciyasın azaytıw, topıraqtaǵı gumus muǵdarın kóbeytiw arqalı eginlerdiń zúrəətliligin həm topıraq ónimdarlıǵın jaqsılaw maqsetinde jańa tártip-qaǵıydalar engizilmekte.
Atap aytqanda, Ózbekstan Respublikasınıӊ «Topıraqtı qorǵaw hám onıń ónimdarlıǵın arttırıw haqqında»ǵı Nızamınıń 10-statyasına muwapıq topıraq monitoringin ámelge asırıw tártibi belgilengen.
Topıraq monitoringin ámelge asırıw, Ózbekstan Respublikası Awıl xojalıǵı minsitrliginiӊ Topıraqtanıw hám agroximiyalıq izertlewler institutı hám onıӊ aymaqlıq bólimleri tárepinen ámelge asırılıwı belgilengen.
Topıraqtanıw hám agroximiyalıq izertlewler institutı tárepinen topıraqtıӊ házirgi jaǵdayı, júz berip atırǵan ózgerislerdi analizlew, bul ózgerislerdiӊ xarakteri hám olardıӊ topıraq ónimdarlıǵına tásirin anıqlaw, unamsız processlerdiӊ aldın alıw hám olardı saplastırıw boyınsha rejeler hám usınıslar islep shıǵıwdı, topıraq monitoringin múlkshilik túrine qaramastan awıl xojalıǵında paydalanılatuǵın jerlerdiӊ barlıq túrleri boyınsha ámelge asırıw, topıraq monitoringi dawamında taӊlap alınǵan topıraq úlgileri milliy hám xalıqaralıq akkreditaciya sistemasındaǵı akkreditaciyalanǵan laboratoriyalarda analiz etiw wazıypası júklendi.
Qarardıń maqseti hám áhmiyetin atap ótetuǵın bolsaq, onda laboratoriya analizlerin ótkeriw, topıraq kartasın avtorlıq túp nusqasın dúziw, topıraqtıӊ ónimdarlı qatlamın esaplaw, maǵlıwmat xatın jazıw hám topıraq kartasına keӊeytilgen túsindirmeler dúziw názerde tutılǵan.
Sonday-aq, topıraqtıӊ ónimdarlı qatlamı boyınsha juwmaq
3 nusqada tayarlanadı. Birinshisi institut arxivinde saqlaw ushın, ekinshi nusqa múrájat iyesi isbilermenlik subyekti orınlawı ushın, úshinshi nusqa Ministrler Kabineti janındaǵı Agrosanaat kompleksi ústinen qadaǵalaw inspekciyasına mámleketlik qadaǵalawdı ámelge asırıw maqsetinde jiberiledi.
Qarardıń taǵı bir zárúr tárepi bar. Usı qarar tiykarında Ministrler Kabineti janındaǵı Agrosanaat kompleksi ústinen qadaǵalaw inspekciyasına qala qurılısı jumısı, geologiyalıq-izlew hám paydalı qazılmalardı qazıp alıw, sonday-aq, awıl xojalıǵına tiyisli bolmaǵan basqa da baǵdarlardaǵı jumıslardı ámelge asırıwshı joybar orınlawshıları tárepinen topıraq katlamınıń súrip alınıwı hám belgilengen dala konturındaǵı kóshirilgenligi tuwralı qadaǵalawdı ámelge asırıw wazıypası júklengenligi maǵlıwmat retinde bildiriledi.

B.Ibraymov,
“Ózagroinspekciya”nıń Qaraqalpaqstan Respublikası basqarması
Awıl xojalıǵına mólsherlengen jerlerden paydalanıwdı
qadaǵalaw bóliminiń baslıǵı.
Qaraqalpaqstan xabar agentligi.