Huqıqıy múnásibet

Mámleketimiz basshısınıń 2024-jıl 14-noyabrdegi «Balalardı sociallıq qorǵaw sistemasın jáne de jetilistiriw ilajları haqqında»ǵı pármanı qabıl etilgen bolıp, bul pármanda tiykarınan jetim, ata-ana qaramaǵınan ayırılǵan, zorlıqtan jábirlengen balalar hám qarawsız qalǵan analar hám hámiledar hayallardı jámiyetke integraciyalaw ushın áhmiyetli ilajlar belgilendi.
Tashkent mámleketlik yuridikalıq universiteti Yuridikalıq klinika xızmetkeri I.Tuev bul boyınsha tómendegi huqıqıy túsiniklerdi berdi:
– Pármanǵa bola, bıyıl 1-yanvardan baslap, mehriybanlıq úyleri hám balalar úylerine kem támiyinlengen shańaraqlardıń perzentlerin waqtınshalıq qabıl etiw tártibi biykar etildi.
Jetim hám ata-ana qaramaǵınan ayırılǵan jaslarǵa bilim alıw, bántligin támiyinlew, emleniw hám turaq jay sharayatların jaqsılaw ushın sociallıq járdem kórsetiledi. Tutınǵan ata-analardı tayarlaw kurslarına jetim, ata-ana qaramaǵınan ayırılǵan balalardı perzentlikke alıw tilegin bildirgen talabanlar da qamtıp alınadı hám basqıshpa-basqısh Ándijan, Samarqand wálayatları hám Tashkent qalasında kishi kólemli balalar úyi shólkemlestiriledi.
Sonday-aq, «Mehir dápteri» qorları saplastırıladı. Joqarı bilimlendiriw mákemelerin tamamlaǵan jetim hám ata-ana qaramaǵınan ayırılǵan jaslar mámleketlik puqaralıq xızmetine tańlawsız qabıl etiledi.
Sonıń menen birge, awır turmıslıq jaǵdayda, jaqınlarınıń járdemisiz qalǵan analar hám hámiledar hayallar ushın «Analar mákanı» xızmeti jolǵa qoyılıp, «Analar mákanı»nda analar hám olardıń balaları waqtınsha 1 jılǵa shekemgi múddette baspana menen támiyinlenedi, sociallıq hám psixologiyalıq járdem kórsetilip, olardı kásipke tayarlaydı hám bántligine járdem beriledi.
Pármanǵa bola, jáne shańaraqlıq balalar úyin shólkemlestiriw ushın shańaraqtıń erli-zayıptan ibarat tolıq shańaraq bolıw talabı biykar etiletuǵının hám 30 jasqa tolǵan Ózbekstan Respublikasınıń puqaralarına shańaraqlıq balalar úyin shólkemlestiriwge ruqsat etiletuǵının atap ótiw kerek. Sociallıq qorǵawǵa mútáj balalar shańaraqqa tárbiyaǵa (patronat) tek ǵana olardıń tuwısqanlarına beriledi.
2025-jıl 1-marttan baslap bolsa jalǵız ana (ata)ǵa bir perzenti ushın bala 3 jasqa tolǵanǵa shekem mektepke shekemgi bilimlendiriw xızmetinen paydalanıw ushın BEMniń 1 esesine shekem materiallıq járdem beriledi. Eger olar egizek bolsa, olardıń hár biri ushın beriledi.

Gulnoza Boboeva,
ÓzA