Házirgi kúnleri Qıtaydıń Xarbin qalasında IX Aziya oyınları bolıp ótpekte.

Bul jarısqa ózbekstanlı sportshılar da qatnaspaqta. Atap aytqanda, búgin mámleketimiz sportshıları eki sport túri boyınsha bellesiwlerge qatnastı. Solardıń birinde figuralı sırǵanaw boyınsha Ózbekstan saylandı komandasınıń aǵzaları Dmitriy Chigirev hám Ekaterina Geynish qısqa baǵdarlama boyınsha jarısqa túsip, onda eń joqarı 64,55 ball toplawǵa eristi.
Bul nátiyje menen olar ekinshi hám úshinshi orınlarda kiyatırǵan Yaponiya hám Arqa Koreya saylandı komandaları aǵzaların ádewir parıq penen artta qaldırıwǵa eristi.
Kúni erteń Tashkent waqtı menen saat 16:30da baslanatuǵın erkin shıǵıw bellesiwlerinen soń, jarıs jeńimpazları anıqlanadı.
Sonday-aq, búgin erler arasında biatlon sportınıń 10 km aralıqqa sprint baǵdarlaması boyınsha jarıs ótkerildi.
Oǵan mámleketimiz saylandı komandası atınan Dilmurod Abdurahmonov hám Rolan Raimqulovlar qatnastı hám 33 sportshı arasında Raimqulov 25, Abdurahmonov 31-orınlardı iyelewge eristi.
Bul jarısta qazaqstanlı Vladislav Kireev hám Vadim Kuralecler altın hám gúmis medallardı qolǵa kirgizgen bolsa, qıtaylı Chang Gu úshinshi orındı iyelewge miyasar boldı.

Adilbay Orazov,
Qaraqalpaqstan xabar agentligi sholıwshısı