Universitet aymaǵındaǵı máhálleler arasında sport jarısları shólkemlestirildi.

Ózbekstan Respublikası Prezidentiniń 2022-jıl 11-apreldegi «Máhállelerde jaslardı ǵalabalıq sportqa tartıwdı jańa basqıshqa alıp shıǵıw ilajları haqqında»ǵı qararında máhállelerde xalıq, ásirese, jaslar arasında ǵalabalıq sport jarısların sistemalı shólkemlestiriw arqalı salamat turmıs tárizin úgit-násiyatlaw, olardı ǵalabalıq sportqa tartıwǵa qaratılǵan áhmiyetli wazıypalar belgilep berilgen.
Berdaq atındaǵı Qaraqalpaq mámleketlik universiteti Dene mádeniyatı fakultetiniń fakultetler aralıq dene mádeniyatı kafedrası tárepinen universitet aymaǵında jaylasqan Shayırlar, Shıǵıs, Almazar hám Qurılısshı mákan puqaralar jıyınlarınıń jasları hám úlken jastaǵıları arasında sporttıń shaxmat-shashka hám kishi futbol túrleri boyınsha jarıslar ótkerildi.
Bul jarısqa máhállelerden jámi 80 nen aslam nuranıylar hám jaslar qatnastı.
Ótkerilgen jarıstıń tiykarǵı maqseti – Húkimet qararlarınıń orınlanıwın támiyinlew, sonday-aq, universitet penen máhálleler arasında birge islesiwdi jáne de kúsheytiw bolıp esaplanadı.
Jarıs qızǵın bellesiwlerge bay bolıp, jaslardıń shaxmat-shashka, kishi futbol túrlerine qızıǵıwshılıǵı hám olardıń sport sheberlikleri sınaqtan ótti.
Jarıs jeńimpazları shólkemlestiriwshiler tárepinen tayarlanǵan diplomlar hám estelik sawǵaları menen sıylıqlandı.

Madina Jumabaeva,
QMU Qaraqalpaq filologiyası hám jurnalistika
fakultetiniń 2-kurs studenti.
Qaraqalpaqstan xabar agentligi.