Ózbekstan hám Malayziya arasındaǵı birge islesiw izbe-iz rawajlanıp, túrli tarawlarda iri joybarlar ámelge asırılmaqta. Еkonomika, sawda, bilimlendiriw, mádeniyat hám turizm sıyaqlı baǵdarlar qatarında ximiya sanaatında da birge islesiw jańa basqıshqa kóterilmekte

Prezidentimiz Shavkat Mirziyoevtiń 4-5-fevral kúnleri Malayziyaǵa rásmiy saparı sheńberinde ótkerilgen birgeliktegi biznes-forum eki mámlekettiń isbilermen toparları ushın jańa imkaniyatlar esigin ashtı.
Forumda «Ózximiyasanaat» AJ basqarması baslıǵınıń orınbasarı Akbar Kurbonov basshılıǵandaǵı delegaciya da qatnastı.
Ilaj dawamında Ózbekstan ximiya sanaatınıń potencialı hám investiciya joybarlarınıń prezentaciyası ótkerildi. Sonday-aq, delegaciya aǵzaları bir qatar iri Malayziya kompaniyaları menen ushırasıwlar ótkerip, perspektivalı birge islesiw baǵdarların dodaladı.
Atap aytqanda, «Petronas» kompaniyasınıń direktorlar keńesiniń baslıǵı Maxd Bakke Sallex penen bolıp ótken sóylesiwde MTO texnologiyası tiykarında birgeliktegi joybarlardı ámelge asırıw hám kadrlar tayarlaw máseleleri dodalandı.
Sonıń menen birge, «Petronas» texnologiya universiteti menen birge islesiwdi rawajlandırıw boyınsha pikir alıstı. «Sparco Engineering» kompaniyasınıń direktorı Sumasni Sulaymon menen ushırasıwda ximiya sanaatında investiciya joybarların islep shıǵıw hám ámelge asırıw imkaniyatları dodalandı.
Tárepler formaldegid, titan dioksidi hám malein kislotasın islep shıǵarıw boyınsha birge islesiw perspektivalarına ayrıqsha itibar qarattı. Malayziya kompaniyası wákilleri usı joybarlarǵa qızıǵıwshılıq bildirip, olardıń joqarı investiciyalıq tartımlıǵın atap ótti.
Bunnan tısqarı, Malayziya Еksimanki kommerciya boyınsha direktorı Foiza Mustafa xanım menen ushırasıw ótkerildi. Sóylesiwler dawmında Ózbekstannıń ximiya sanaatında ámelge asırılıp atırǵan joybarlardı qarjılandırıw perspektivaları kórip shıǵıldı.
«Ózximiyasanaat» AJ delegaciyasınıń Malayziyaǵa saparı dawmında jetekshi kompaniyalar menen áhmiyetli sóylesiwler ótkerilip, investiciyalıq hám texnologiyalıq birge islesiw boyınsha kelisimlerge erisildi. Bul bolsa sanaattıń rawajlanıwı, innovaciyalardı engiziw hám joqarı qunǵa iye ónimler islep shıǵarıwǵa keń imkaniyat jaratadı.

N.Ziyodullaeva, ÓzA