Ózbekstan Respublikası Prezidentiniń «Ózbekstan – 2030» strategiyasın «Qorshaǵan ortalıqtı qorǵaw hám «jasıl ekonomika» jılında ámelge asırıwǵa baylanıslı mámleketlik baǵdarlama haqqında»ǵı Pármanı qabıl etildi.

Oǵan bola, mekteplerdegi ózbek tili (mámleketlik til) páni muǵallimleriniń miynet haqısına qosımsha haqı tólenedi. Bul haqqında Mektepke shekemgi hám mektep bilimlendiriwi ministri Hilola Umarova óziniń kanalında málim etti.
Xabarda aytılıwınsha, endigiden bılay ózbek tili hám ádebiyatı sertifikatına iye bolǵan pedagog kadrlarǵa 50 procent muǵdarında hár aylıq qosımsha ústeme tólenedi.
«2025-jıl 1-fevraldan baslap Mektepke shekemgi hám mektep bilimlendiriwi ministrligi sistemasındaǵı ulıwma bilimlendiriw mákemelerinde ózbek tili (mámleketlik til) páni boyınsha sabaq beriwshi hám Bilim hám mamanlıqlardı bahalaw agentliginiń milliy bahalaw sistemasında alınǵan tiyisli dárejedegi ózbek tili hám ádebiyatı sertifikatına iye bolǵan pedagog kadrlarǵa olardıń tarif stavkasına salıstırmalı 50 procent muǵdarında hár aylıq qosımsha ústeme tólenedi»,-delinedi xabarda.

Qaraqalpaqstan xabar agentligi