Respublikamızdıń barlıq aymaqlarında bolǵanı sıyaqlı isbilermenlikti qollap-quwatlaw hám jańa joybarlardı iske túsiriwde ushırasıp atırǵan mashqalalardı anıqlaw, olardı saplastırıw boyınsha gezektegi ushırasıw Nókis qalasında da bolıp ótti.

Ilajǵa paytaxtımızda jumıs islep atırǵan isbilermenler menen birge, Nókis qalası hákimi A.Daniyarov, bir qatar ministrlik hám shólkemlerdiń basshıları qatnastı.
Ushırasıwda Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń basshılıǵında 2025-jılda ámelge asırılıwı belgilengen investiciyalıq joybarlardı iske túsiriw, lokalizaciyalastırıw baǵdarlamasına kirgizilgen hám eksportyor kárxanalarǵa ámeliy járdemler kórsetiw, sanaat ónimlerin islep shıǵarıwshı kárxanalardıń tolıq quwatlılıqta islewin támiyinlew máseleleri talqılandı.
Ilajda Joqarǵı Keńes Baslıǵı Amanbay Orınbaev tárepinen Ózbekstan Respublikası Prezidentiniń basshılıǵında elimizde isbilermenlikti jáne de rawajlandırıw, olar ushın barlıq qolaylı sharayatlardı jaratıw baǵdarında ámelge asırılıp atırǵan keń kólemli reformalar, Qaraqalpaqstan ushın óz aldına qabıl etilgen tariyxıy párman hám qararlar haqqında keń túrde atap ótilip, ayırım taraw juwapkerleriniń óz jumısına nemquraydılıq penen qarawı nátiyjesinde, orınlarda bir qatar kemshilikler kózge taslanıp atırǵanı sın kózqarasta dodalandı.
Bul kemshiliklerdi unamlı sheshiw máseleleri boyınsha isbilermenlerdiń pikir-usınısları tıńlanıp, olardı saplastırıw ushın juwapker basshılarǵa tiyisli kórsetpeler berildi.
Ilajda jańa jumıs orınların jaratıwǵa qaratılǵan hár qanday investiciya, óndiris hám sanaattı rawajlandırıw boyınsha joybarlar Prezidentimiz tárepinen bárqulla qollap-quwatlanatuǵınlıǵı Joqarǵı Keńes Baslıǵı tárepinen ayrıqsha tilge alınıp, bul baǵdardaǵı jumıslar bunnan bılay da dawam etetuǵınlıǵına isenim bildirdi.

Qaraqalpaqstan xabar agentligi