Prezident Shavkat Mirziyoev 10-fevral kúni atom energetikası tarawında ámelge asırılıp atırǵan jumıslar hám keleshektegi tiykarǵı wazıypalar boyınsha májilis ótkerdi.

Xalıq hám ekonomika tarmaqlarınıń ósip baratırǵan talabın támiyinlew ushın mámleketimizde energetikanıń barlıq derekleri iske qosılmaqta. Dástúriy generaciyadan tısqarı, sońǵı jılları derlik 4 gigavattlı optimal quwatlıqlar iske qosıldı hám «jasıl» energiyaniń úlesi 16 procentke jetti.
Kelesi bes jılda jáne 25 gigavattlı qayta tikleniwshi energiya derekleri qurıladı. Bulardıń esabınan jılına 64 milliard kilovatt saat «jasıl» energiya alınadı. Ulıwma, 2030-jılǵa barıp, elimizde jámi generaciyada «jasıl» energiyanıń úlesin 50 procentten arttırıw maqset etilgen.
Házirgi waqıtta sanlı texnologiyalar, elektromobiller, elektr úskeneleri, jasalma intellekt, mayning sıyaqlı tarmaqlardıń rawajlanıwı energiyaǵa bolǵan talaptı keskin arttırmaqta. Sonıń ushın kóplegen mámleketler jańa túrdegi energiya quwatlıqlarına ótiw jolların izlemekte. Jerdiń astınan qazıp alınatuǵın janılǵılar óz ornın qayta tikleniwshi dáreklerge bosatıp bermekte. Búgingi kúnge kelip, dúnyadaǵı jámi generaciyanıń 42 procenti optimal energiya bolıp esaplanadı.
Uzaq jıllıq quwatlıqlardı qurıwda atom energetikası optimal bolıp esaplanadı. Házirgi kúnde dúnyada 375 gigavattlı 417 atom reaktorlarınan paydalanılmaqta. Jáne jańa stanciyalar qurılmaqta, kóp mámleketler atom energetikasın óziniń rawajlanıw strategiyasına kirgizbekte.
Mámleketimizde uran rezervi bar ekenliginen paydalanıp, uzaq múddetke mólsherlengen quwatlılıq shólkemlestiriw rejelestirilgen. Atap aytqanda, kishi quwatlıqtaǵı reaktorlar qurıw joybarı islep shıǵıldı. 2024-jıl 5-dekabrde Samarqand qalasında atom energiyasınan paydalanıw máseleleri boyınsha xalıqaralıq konferenciya ótkerildi.
Májiliste juwapkerler atom energetikasın rawajlandırıwǵa baylanıslı islenip atırǵan jumıslar boyınsha málimleme berdi.
Mámleketimiz basshısı bolajaq stanciya hám sistemada isleytuǵın qánigelerdi házirden tayarlaw, qáwipsizlikti Xalıqaralıq atom energiyası agentliginiń talapları dárejesinde támiyinlew boyınsha tapsırmalar berdi. Bunday texnologiyalar ekonomikanıń básekige shıdamlılıǵın arttırıp, uzaq múddetli ósiw pátleri ushın múnásip tiykar jaratatuǵını atap ótildi.

ÓzA