Xabarıńız bar, házirgi waqıtta Bajıxana komitetiniń Bajıxana institutına oqıwǵa kiriwdi qálewshi talabanlar ushın qabıllaw processleri dawam etpekte. Hár jılı 1-yanvardan 1-aprelge shekem dawam etetuǵın qabıllaw processlerine bajıxanashı bolıwdı qáleytuǵın jaslardıń hújjet tapsırıp úlgeriwi ushın orınlarda úgit-násiyat jumısları ámelge asırılmaqta.
Qaraqalpaqstan Respublikası Bajıxana basqarması xızmetkerleri, bajıxana institutı kursantları menen birgelikte Nókis qalasındaǵı “Temurbekler mektebi” áskeriy akademiyalıq liceyi oqıwshıları menen ushırasıp, bajıxana institutı haqqında tolıq maǵlıwmatlar berildi.
Bajıxana institutında oqıw múddeti 4 jıl bolıp, bajıxana jumısı hám bajıxana jumısın huqıqıy júrgiziw tálim baǵdarlarında oqıwǵa kiriwdi qálewshi talabanlar óz hújjetlerin tapsırıwı múmkin. Psixologiyalıq test, fizikalıq tayarlıq hám awızsha sáwbetlesiw shártlerinen tabıslı ótken talabanlar Mámleketlik test orayı tárepinen abiturientlerden alınatuǵın test sınaqlarına jollama aladı hám test nátiyjeleri boyınsha joqarı ball alǵanlar oqıwǵa qabıl etiledi.
Ushırasıwda bajıxana sistemasına maman hám bilimli kadrlardı jetkerip beretuǵın Bajıxana institutına qabıllaw processleri, tańlaw shártleri, talabannıń juwap beriwi shárt bolǵan fizikalıq parametrleri haqqında tolıq maǵlıwmatlar berilip, qabıllawdan keyingi oqıw dáwiri hám bajıxana institutında jaratılǵan sharayatlar menen jaqınnan tanıstırıldı.
Ilajda oqıwshılardıń qızıqtırǵan sorawlarına juwap berilip, qabıllaw boyınsha qosımsha maǵlıwmatları bar bukletler tarqatıldı.
Usınday ushırasıw Arqa-Batıs áskeriy okruginde múddetli áskeriy xızmetti ótep atırǵan qatardaǵı áskerler menen de bolıp ótti. Olarǵa da Bajıxana institutınıń jumısları, kursantlarǵa jaratılǵan sharayatlar, oqıwǵa kiriw processleri, oqıw dawamında kursantlardıń kiyim-kenshek hám azıq-awqat penen támiyinleniwi hám basqa da ózgeshelikleri haqqında keń túrde maǵlıwmatlar berildi.
Ushırasıw juwmaǵında qatardaǵı áskerler ózlerin qızıqtırǵan sorawlarǵa juwap aldı.
Á.Jiyemuratov,
Qaraqalpaqstan xabar agentligi