Istiń kózin bilgenge keń imkaniyatlar jaratılıp atırǵan elimizde isbilermenlik tarawı jedel rawajlanıp, olardıń mámleketimiz ekonomikasındaǵı tutqan ornı jıldan-jılǵa artıp barmaqta. Bul bolsa, aymaqlardıń sociallıq-ekonomikalıq rawajlanıwına óziniń unamlı tásirin tiygizbekte.

Samanbay awıl puqaralar jıyını turǵını Jańabay Baltabaev ta ózine jaratılıp atırǵan imkaniyatlardan nátiyjeli paydalanıp kiyatırǵan jaslardıń biri. 2002-jılı Kegeyli rayonında tuwılıp, kamalǵa kelgen ol, mektepti pitkergennen soń kópshilik jaslar sıyaqlı, joqarı oqıw ornında oqıwǵa emes, al, qanday da bir talaptıń basın uslap, dáramat tabıwdı maqset etti. Ol usı niyetlerin ámelge asırıw ushın Nókis rayonında jasawshı bólesi Batırbek Pirimbetov penen oylasqanında, bólesi oǵan bódene ósiriw menen shuǵıllanıwdı másláhát etip, Jańabaydı hár tárepleme qollap-quwatladı.
«Kóplep tartqan júk jeńil» degenindey Jańabay menen Batırbektiń birgeliktegi is-jobalarınıń nátiyjesinde, 2019-jılı Xorezm wálayatınan 50 bas yapon bódenesin alıp kelip, Batırbektiń shańaraǵında saqlay basladı. Sońın ala bódene saqlawdıń ádisin úyrengen olar, bódenelerdiń bas sanın inkubator arqalı kóbeytip bardı.
-Házirgi waqıtta qoramızda 5000 bas bódene saqlap atırmız,-deydi Jańabay quwanıshlı keypiyatta.-Sonnan kún sayın Nókistiń oraylıq bazarındaǵı satıwshılarǵa 4800-4900 dana máyekti 600 sumnan satıp, jumıslarımızdı janlandırıp atırmız. Úyimiz janında inkubaciya cexı islep tur. Bódenelerdi 7-8 ay saqlaǵannan soń, olardıń máyek tuwıwı azayadı. Sonlıqtan olardı usı waqıtta soyıp, bazarǵa satamız. Olardıń ornına jas shójelerdi baǵıp, ósirip atırmız. Ótken jılı «Xalıq bank»ten 33 mln sum kredit alıp, oǵan Xorezm wálayatınan arnawlı jemler satıp aldıq. Aldaǵı waqıtları bul tarawdı ele de rawajlandırıp, xalqımızdı arzan hám sapalı gósh hám máyek ónimleri menen támiyinlewge háreket etemiz. Bunıń ushın bizlerde barlıq imkaniyat hám múkinshilikler bar.
Haqıyqatında da, sońǵı jılları jaslar arasında isbilermenlikti rawajlandırıwǵa qaratılıp atırǵan itibar hám qollap-quwatlaw nátiyjesinde Jańabayǵa uqsaǵan jaslar ózleriniń biznes joybarların ámelge asırıp, xalıq abadanlıǵınıń artıwına ózleriniń úleslerin qosıp kelmekte. Bunday isker jaslarǵa bolsa, aymaqlardaǵı máhálle jetilikleri jaqın qol-qanat bolmaqta.

Adilbay Orazov,
Qaraqalpaqstan xabar agentligi sholıwshısı