Házir úlkemizde áyne qıs máwsimi dawam etpekte. Qıstıń qırawlı kúninde jazdıń jamalın, báhárdiń gózzallıǵın baǵıshlawshı qolı gúl qıytaq jer iyeleri ózleriniń úy qaptalındaǵı qıytaq jerlerine hár qıylı palız ónimleri menen birge shıraylı gúllerdi jetistirip, xalqımızǵa usınbaqta. Ásirese, bunday shańaraqlar Beruniy rayonında kópshilikti quraydı. Solardıń biri ıssıxanaǵa gúllerdi egip onı respublikamızdıń barlıq rayonları menen birge qońsı Xorezm wálayatına jetkerip berip kiyatırǵan Bostan máhállesinde jasawshı Gúljamal Asqarova máwsim dawamında 80-100 mln sum dáramat tabadı.
-Eger insan miynet etse, barlıq nárseniń ilajın tapsa boladı. Mine, qıytaq jerimizden bir neshe jıllardan berli gúl jetistirip kiyatırmız. Kórgen waqıtta adamǵa quwanısh baǵıshlaytuǵın gúllerdiń tárbiyası menen shańaraǵımızda perzentlerim, aqlıqlarım menen birgelikte shuǵıllanıp kiyatırmız. Bárshege miynet etip, óz shańaraǵına qosımsha dáramat tabıwǵa shaqırǵan bolar edim. Sebebi, qıytaq jer mol dáramat deregi,-deydi G. Asqarova.
Qıs biykarshınıń emes al, miynetke bolǵan talaptıń artıp, tınıp-tınshımaytuǵın máháli. Bul shańaraq iyeleri tórt máwsimde de qıytaq jerinde diyqanshılıq etip, jerden mol dáramat tabıwǵa háreket etedi hám sonıń menen birge perzentlerin de miynet islewge úyretedi. Bıyılǵı «Qorshaǵan ortalıqtı qorǵaw hám «jasıl» mákan jılı» nda elimizde ámelge asırılıp atırǵan kóklemzarlastırıw ilajlarına úles qosıwdı óz shańaraǵınan baslaǵan olar, báhárde egetuǵın nállerin ıssıxanalarda jetistiriwdi házirden-aq baslap jibergen. Bunday ilajlar bárshege órnek bolsa arzıydı.

G.Turdıshova, Qaraqalpaqstan xabar agentligi