Sociallıq tarmaqlarda Buxara wálayatı Romitan rayonı Gazli qalashasına jaqın aymaqta órt júz berip atırǵanı haqqında xabar tarqaldı.

Buxara wálayatı Ayrıqsha jaǵdaylar basqarmasınan alınǵan xabarǵa qaraǵanda, búgin 10-fevral kúni saat 11:26 da «Gazli» magistral gaz qazıw basqarmasınıń diametri 1020 mm bolǵan 26 kg basım astındaǵı «Buxara-Ural» MGQnıń jer astınan ótken 106 kilometrinde (eń jaqın elatlı punkt Romitan rayonı «Qızıl rabat» mákan puqaralar jıyınınan 40 kilometr uzaqlıqta) avariya júz bergen.
Alıp barılǵan operativ háreketlerdiń nátiyjesinde saat 11:30da qulaǵı jabılıp, qaldıq gazlerdiń shıǵıp ketiwi baqlanǵan. Házir avariya tolıq saplastırılǵan. Waqıya ornına wálayatlıq AJB, Romitan rayonı AJB baslıǵı 1 órt-qutqarıw ekipajı jetip barǵan.
Hádiyse aqıbetinde dene jaraqatın alǵanlar hám qaytıs bolǵanlar joq.

Qaraqalpaqstan xabar agentligi