Ózbekstan Respublikası Prezidentiniń 2023-jıl 16-fevraldaǵı «Jámiyetlik transport sistemasın reformalaw ilajları haqqında»ǵı PQ-59-sanlı qararında jámiyetlik transportta jolawshılardı tasıwda zamanagóy málimleme-kommunikaciya texnologiyaların engiziw arqalı xalıqqa transport xızmetlerin kórsetiw sapasın jaqsılaw, jol haqını jıynawda ashıqlıqtı támiyinlew, ulıwma paydalanatuǵın transportta jolawshı tasıw sistemasın bunnan bılay da jetilistiriw, avtomatlastırılǵan tólew sistemasın basqıshpa-basqısh engiziw belgilengen.
-Prezidentimizdiń qararınıń orınlanıwın támiyinlew, qala xalqına jáne de qolaylıqlar jaratıw maqsetinde, jol haqını elektron sistema arqalı ámelge asırıw jolǵa qoyıldı,-deydi Qaraqalpaqstan Respublikası transport ministrliginiń Málimleme xızmeti baslıǵı Zahida Qaljanova.-Sonıń ishinde, házirgi waqıtta Nókis qalasına jańadan alıp kelingen 12 avtobusqa elektron tólemin qabıl etiwshi stacionar validatorlar ornatılǵan bolıp, onda jolawshılar bank plastik kartası arqalı jol haqını tólewi múmkin.
Z.Qaljanovanıń málim etiwinshe, fevral ayınıń aqırına taman jolawshı tasıw menen shuǵıllanıwshı kárxanalar tárepinen Nókis qalasına jáne de 44 avtobus alıp kelinedi. Álbette, transport tarawında ámelge asırılıp atırǵan bunday reformalar, xalqımızdıń iygiligi ushın xızmet etedi, dep oylaymız.

Adilbay Orazov,
Qaraqalpaqstan xabar agentligi sholıwshısı