Tórtkúl rayonındaǵı 8-sanlı ulıwma bilim beriw mektebinde ullı dóretiwshi tulǵalar Áliysher Nawayı hám Zahriddin Muhammed Baburdıń dóretiwshiligine baǵıshlanǵan «Biz ullı babamız Áliysher Nawayı hám Zahriddin Muhammed Baburdıń izbasarlarımız» atamasında ádebiy dóretiwshilik keshe bolıp ótti.

Ilajǵa rayon hákiminiń orınbasarı G. Nazarova, Respublika Ruwxıylıq hám aǵartıwshılıq orayınıń Tórtkúl rayonlıq bólimi baslıǵı Janibek Settiev, shayır M.Yusupova hám muǵallimler menen oqıwshı-jaslar qatastı. Dóretiwshilik kesheni mektep direktorı B.Atadjanov kiris sóz benen ashtı hám ullı sóz zergerleriniń máńgilik shıǵarmaları ásirler dawamında jasaytuǵının hám olardıń jaslar tárbiyasında úlken orın tutatuǵının atap ótti. Bunnan soń sózge shıqqanlar ullı shayırlardıń shıǵarmalarınıń qunlılıǵı, biybaha ádebiy hám mádeniy miyras ekenligi haqqında sóz etti.
Ádebiy bólimde mektep oqıwshıları Nawayı hám Babur shıǵarmalarınan kórkemlep oqıp, saxnalıq kórinisler qoyıp berdi. Dóretiwshilik keshe jaslarımızdıń ádebiyatqa hám ullı shayırlardıń ádebiy miyraslarına degen qızıǵıwshılıǵın arttırıwǵa tiykar boları anıq.

Yulduz Niyozova, Berdaq atındaǵı QMU dıń qaraqalpaq filologiyası hám jurnalistika fakultetiniń 2-kurs studenti.
Qaraqalpaqstan xabar agentligi