Nѳkis qalalıq 46-sanlı ulıwma bilim beriw mektebinde alıp barılıp atırǵan ruwxıy-aǵartıwshılıq ilajlar sheńberinde mektep oqıwshılarınıń jas isbilermenler G.Eliwbaeva hám A.Tlewovalar menen ushırasıwı bolıp ѳtti.
Onda atap ótilgenindey, milliy kiyim – bul xalqımızdıń biybaha baylıǵı. Milliy kiyim – bul ápiwayı kiyim emes, ol xalıqtıń mádeniyatı hám tariyxı, salt-dástúri hám turmıs tárizi sáwlelengen ata-babalarımızdıń bizge qaldırǵan muqaddes miyrası.
Ushırasıwda xalqımızdıń qol ónermentshilik ónimleri, milliy kiyimler, ondaǵı naǵıslardıń ózgeshelikleri, mánisi, bunday kiyimler qalay tigiletuǵınlıǵı tuwralı keń túrde maǵlıwmatlar berildi.
Álbette, usınday ilajlardıń bilimlendiriw mákemelerinde ѳtkeriliwi, oqıwshı-jaslarımızda xalqımızdıń salt-dástúrlerine degen qızıǵıwshılıǵın, tuwǵan jerge degen maqtanısh sezimin hám xalıq ѳnermentshiligine degen húrmet sezimlerin rawajlandırıwǵa xızmet etedi.
Ushırasıwda oqıwshı qızlar ózlerin qızıqtırǵan sorawlarǵa juwap aldı.

Madina Jumabaeva,
QMU Qaraqalpaq filologiyası hám jurnalistika
fakultetiniń 2-kurs studenti.
Qaraqalpaqstan xabar agentligi.