Húrmetli simpozium qatnasıwshıları!
Húrmetli miymanlar!
Bárinen burın, siz ázizlerdi, «Áliysher Nawayı hám Shıǵıs Renessansı» IV xalıqaralıq simpoziumınıń ashılıwı menen shın júrekten qızǵın qutlıqlayman.
Áyyemgi Ózbekstan jerinde, gózzal Zarafshan úlkesinde Shıǵıs Oyanıw dáwiriniń jarqın ǵayratkeri, ullı shayır hám oyshıl Mir Áliysher Nawayınıń atı menen atalatuǵın náwqıran qalada birinshi márte ótkerilip atırǵan bul forumnıń abırayı dúnya kóleminde barǵan sayın artıp barmaqta. Bul retki ánjumanda Aziya, Afrika, Evropa hám Amerika kontinentleri mámleketlerinen kóplegen belgili ilimpaz hám izertlewshiler qatnasıp atırǵanı da bul pikirdi ayqın dálilleydi.
Bul ánjuman Nawayı wálayatında «Áliysher Nawayı jılı» dep járiyalanǵan bıyılǵı jılı, ullı ata-babamızdıń 584 jıllıq tuwılǵan sánesi keńnen belgilenip atırǵan kúnlerde ótip atırǵanı onıń payızın hám qızıǵıwshılıǵın jáne de arttırmaqta.
Qádirli doslar!
Dúnya ádebiyatı hám rawajlanıw tariyxında óshpes iz qaldırǵan Áliysher Nawayınıń kóp qırlı jámiyetlik-siyasiy, dóretiwshilik, ilimiy-aǵartıwshılıq jumısı, bay ádebiy-kórkem miyrası ásirler dawamında joqarı adamgershilik, Watanǵa sadıqlıq, ádillik hám jaqsılıq simvolı sıpatında bárqulla jáhán xalqınıń itibarın tartıp kelmekte.
Házireti Mir Áliysher Nawayı oǵada qıyın sharayatta milliy hám ulıwma insanıylıq ideyalardı bálent kóterip shıqqanı, ózbek ádebiy tiline tiykar salıp, onıń máńgilik ruwxı, qúdireti hám gózzalıǵın hár tárepleme dáliyllep bergeni shın mánisindegi mártlik úlgisi, desek, áyne haqıyqattı aytqan bolamız.
Bul klassikalıq tulǵa dónya ádebiyatı ólshemlerine, zaman hám tariyx sınaqlarına tolıq juwap beretuǵın dúrdana shıǵarmalar dóretip, tek ózbek emes, al barlıq túrkiy ádebiyatlardıń rawajlanıwına sheksiz úles qosqanı da joqarı maqtawǵa múnásip bolıp esaplanadı.
Áliysher Nawayınıń biybaha dóretiwshilik miyrası haqılı túrde dúnya ádebiyatı danıshpanlarınıń ullı shıǵarmaları menen bir qatarda turıwı bizge sheksiz maqtanısh baǵıshlaydı.
Ásirese, oyshıl ata-babamızdıń túrli xalıqlar arasında tınıshlıq hám doslıqtı bekkemlew, adamzattıń jarqın keleshegin birgelikte qurıwǵa shaqıratuǵın ideya hám kózqaraslarınıń áhmiyeti házirgi qáweterli dáwirde barǵan sayın artıp barmaqta.
Búgingi kúnde biz Jańa Ózbekstanda Úshinshi Renessanstı qurıw processlerinde Áliysher Nawayınıń shıǵarmaların ózimiz ushın tawsılmas kúsh-ǵayrat hám ilham deregi dep bilemiz. Sonlıqtan bul siyrek ushırasatuǵın baylıqtı tereń úyreniw hám úgit-násiyatlaw bárqulla itibarımız orayında boladı.
Pursattan paydalanıp, usı baǵdarda elimizdiń ilimpazları menen belsene birge islesip kiyatırǵan siz, ázizlerge, barlıq ilim ǵayratkerlerine tereń minnetdarshılıq bildiremen.
Bul ánjumanǵa puxta tayarlıq kórgen, Áliysher Nawayınıń tuwılǵan áyyyamın úlken shadlıq hám dóretiwshilik jumısları menen kútip alıp atırǵan Nawayı qalası hám wálayatınıń xalqına, juwapker basshılarǵa da qızǵın minnetdarshılıq bildiremen.
Sizlerdi jáne bir márte shın júrekten qutlıqlap, bársheńizge bekkem densawlıq, ilimiy hám dóretiwshilik jumısıńızda úlken jetiskenlik hám áwmetler, ánjuman jumısına bolsa tabıs tileymen.

Shavkat Mirziyoev,
Ózbekstan Respublikası Prezidenti