Xabarıńız bar, usı jıldıń 7-fevral kúni Qaraqalpaqstan Respublikası delegaciya aǵzaları Kambodja mámleketiniń paytaxtı Pnompen qalasındaǵı Paragon xalıqaralıq universitetinde Samarqand qalasında bolıp ótetuǵın YuNESKO Bas konferenciyasınıń 43-sessiyasına tayarlıq processleri sheńberinde “Ózbekstannıń mádeniy miyrası hám reformaları” atamasında úgit-násiyatlaw ilajların alıp bardı.

Ilaj sheńberinde Berdaq atındaǵı Qaraqalpaq mámleketlik universitetiniń rektorı, akademik A.Reymov Paragon xalıqaralıq universitetiniń rektorı B.Axmetkarimov penen ushırasıp, eki oqıw ornı arasında bilimlendiriw baǵdarında birge islesiw boyınsha sáwbetlesti,-dep xabar bermekte QMU baspasóz xızmeti.
Sáwbetlesiw barısında, eki universitet arasında ilimiy-izertlew jumısların birgelikte alıp barıw, studentler, oqıtıwshılar hám izertlewshilerdiń almasıw baǵdarlamaların shólkemlestiriw, studentler hám pitkeriwshiler ushın birgeliktegi izertlewler, stajirovkalar hám ámeliyat baǵdarlamaların islep shıǵıw, ilimiy hám akademiyalıq baylanıslardı jolǵa qoyıw, xalıqaralıq seminarlar, ilimiy konferenciyalardı birgelikte shólkemlestiriw boyınsha birge islesiw memorandumına qol qoyıldı.
Bul kelisim eki joqarı oqıw ornı arasındaǵı doslıq baylanısların jáne de bekkemlew menen birge, joqarı bilimlendiriw tarawlarında jańa innovaciyalıq ideyalar hám texnologiyalardı rawajlandırıwǵa xızmet etedi.

Qaraqalpaqstan xabar agentligi