Qaraqalpaqstan Respublikası Densawlıqtı saqlaw ministrliginde Mámleketlik medicinalıq qamsızlandırıw qorı Qaraqalpaqstan Respublikası aymaqlıq bólimi menen birgelikte taraw basshılarınıń qatnasıwında ǵalaba xabar qurallarınıń wákilleri ushın baspasóz konferenciyası ótkerildi.

Xalıqqa kórsetilip atırǵan medicinalıq xızmetlerdiń sapasın arttırıw, densawlıqtı saqlaw sistemasında ámelge asırılıp atırǵan reformalardı izbe-iz dawam ettiriw, byudjet qarjılarınan nátiyjeli paydalanıw hám mámleketlik medicinalıq qamsızlandırıw mexanizmlerin engiziw boyınsha jumıslardı ámelge asırıw maqsetinde, Ózbekstan Respublikası Prezidentiniń 2024-jıl 5-sentyabr kúngi «Mámleketlik medicinalıq qamsızlandırıw mexanizmlerin engiziw boyınsha ilajlar haqqında»ǵı qararı qabıl etilgen edi.
Usı qarar tiykarında bul mexanizm 2024-jıldıń 1-oktyabrinen baslap, Tashkent qalası hám Sırdárya wálayatında, 2025-jıldan baslap Qaraqalpaqstan Respublikası, Nawayı, Samarqand, Buxara, Xorezm hám Qashqadárya wálayatları, 2026-jıldan baslap mámleketimizdiń barlıq aymaqlarında engiziliwi belgilengen.
Baspasóz konferenciyasında Qaraqalpaqstan Respublikası Densawlıqtı saqlaw ministri M.Qurbanov, Mámleketlik medicinalıq qamsızlandırıw qorı Qaraqalpaqstan Respublikası aymaqlıq bóliminiń baslıǵı Q.Kamalov hám basqalar shıǵıp sóylep, medicinaǵa mámleketlik medicinalıq qamsızlandırıw mexanizmleriniń engiziliwi boyınsha ámelge asırılıp atırǵan jumıslar tuwralı keń túrde maǵlıwmatlar berildi.
Atap ótilgenindey, usı qarardıń áhmiyetin keń jámiyetshilikke keńnen túsindiriw kerek.
Mámleketlik medicinalıq qamsızlandırıw sheńberinde biypul medicinalıq xızmetler hám dári-dármaqlar mámleket byudjetine tólenetuǵın salıqlar esabınan ámelge asırıladı. Yaǵnıy, xalıqtan qamsızlandırıw ushın qosımsha tólem óndirilmeydi.
Tómendegilerdi názerde tutıwshı mámleketlik medicinalıq qamsızlandırıw mexanizmleri basqıshpa-basqısh engiziledi.
– Sonıń ishinde, mámleketlik byudjet qarjıları esabınan qaplanatuǵın medicinalıq járdemniń kepillengen kólemleri tastıyıqlanadı hám bul paketke kirgizilgen medicinalıq xızmetler hám dári quralları Mámleketlik medicinalıq qamsızlandırıw qorınıń qarjıları esabınan kórsetiledi,-deydi Q.Kamalov.
Kepillengen paketke kirgizilgen medicinalıq xızmetlerden biypul paydalanıw ushın belgilengen múddetlerde tiyisli medicinalıq tekseriwlerden ótiw, shańaraqlıq shıpakerge yaki medicina brigadasına múrájat etiw talap etiledi. Shıpaker rásmiylestirgen elektron recept tiykarında dári quralları kepillengen paket sheńberinde nawqaslarǵa dárixanalar esabınan biypul beriledi hám dárixanalardıń tiyisli qárejetleri qordıń qarjıları esabınan qaplanadı (reimbursaciya baǵdarlaması).
Sonday-aq, medicina shólkemleriniń jumıslarındaǵı processlerdi óz ishine alıwshı «Еlektron densawlıqtı saqlaw» málimleme sisteması jaratıladı hám iske túsiriledi. Kepillengen paketke kirgizilgen medicinalıq xızmetlerdi kórsetiwge mámleketlik hám mámleketlik emes medicinalıq shólkemler keńnen tartıladı. Bunda rayonlıq (qalalıq), wálayatlıq hám respublikalıq emlewxanalarda medicinalıq járdem kórsetiwde keselliktiń awırlıq dárejesinen kelip shıǵıp, biypul emlenetuǵın nawqaslardıń dizimi tastıyıqlanadı hám ámeliyatqa engiziledi. Jeńillikli kategoriyadaǵı nawqaslar shıpakerlerdiń kórsetpesine bola málimleme sisteması arqalı qáliplestiriletuǵın jollama tiykarında Mámleketlik byudjet qarjıları esabınan biypul emlenedi.
Qararǵa muwapıq, 2025-jıl 1-iyulden baslap tómendegiler mámleketlik medicinalıq qamsızlandırıw mexanizmleri engizilgen aymaqlarda rayon (qala)lıq hám aymaqlıq dárejedegi medicina mákemelerinde rejeli stacionar medicinalıq járdemdi elektron gezek tiykarında biypul alıw huqıqına iye boladı. Yaǵnıy, fizikalıq táreplerden alınatuǵın dáramat salıǵı yaki sociallıq salıq tólewshiler, salıq kodeksine muwapıq miynet stajın esaplap shıǵıw ushın belgilengen muǵdarlarda salıq tólegen shaxslar, jas óspirimler, bilimlendiriw shólkemleriniń oqıwshı-studentleri, hámiledar hayallar hám eki jasqa tolmaǵan balasın baǵıp atırǵan shaxslar, miynet uyımlarına jumıssız sıpatında rásmiy dizimnen ótkenler, mámleketlik pensiyasın alıwshılar hám «Sociallıq qorǵawdıń birden-bir reestri» málimleme sisteması arqalı kem támiyinlengen, dep kórsetilgen shańaraqlardıń aǵzaları.
2027-jıl 1-yanvardan sońǵı bir jıl dawamında keminde 6 ay fizikalıq táreplerden alınatuǵın dáramat salıǵı sociallıq salıq tólegenler ushın mámleketlik medicinalıq qamsızlandırıw sistemasında joqarı texnologiyalıq medicinalıq járdem biypul ámelge asırıladı.
Qararǵa muwapıq, mámleketlik medicinalıq qamsızlandırıw mexanizmlerin engiziw sheńberinde, 2024-jıldıń aqırına shekem «Еlektron poliklinika» hám «Еlektron emlewxana» málimleme sistemaları ámeliyatqa engizildi. Mámleketlik medicinalıq qamsızlandırıwdıń málimleme sisteması islep shıǵıldı hám ol da ámeliyatqa engizildi.
Medicina mákemesi basshısına mákemeniń quwatlılıǵı sheńberinde bólimshelerdiń qánigelesiwin, olardaǵı emleniw orınları sanın ózgertiw hám ajıratılǵan qarjılar sheńberinde xızmetkerler sanın jumıs kólemine muwapıq belgilew kepilligi berildi.
Medicina mákemeleri ushın tastıyıqlanǵan shtat normaları usınıslıq túrge iye esaplanadı hám 2025-jıldıń 1-iyulinen medicina hám farmacevtika xızmetkerleriniń miynetine haqı tólewdiń óz aldına tártibi hám shártleri engiziledi. Kórsetilip atırǵan medicinalıq járdemniń tastıyıqlanǵan standart hám protokollarǵa muwapıqlıǵı hám sapası qadaǵalanadı.
2025-jıl 1-aprelge shekem Mámleketlik byudjet qarjıları esabınan jeńillikli kategoriyaǵa kiriwshi shaxslar emlenetuǵın nawqaslar dizimi hám bazalıq bahaları nawqaslardı emlew baǵdarları tiykarında barlıq medicina shólkemleri ushın qayta tastıyıqlanadı.
Baspasóz konferenciyası dawamında ǵalaba xabar qurallarınıń wákilleri ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi