Sociallıq tarmaqlarda Prezident Administraciyasında shtat birlikleri keminde 50 procentke, basqa mámleketlik shólkemlerde de qısqartıw bolatuǵını haqqında rásmiy túrde tastıyıqlanbaǵan maǵlıwmatlar tarqatılmaqta. Prezident baspasóz xatkeri Sherzod Asadov usı xabarlar boyınsha múnásibet bildirdi.

Atap ótiliwinshe, barlıq dárejelerdegi mámleketlik hákimiyat hám basqarıw uyımlarında, sonıń ishinde, Prezident Administraciyasınan baslap tómengi shólkemlerge shekemgi barlıq uyımlarda shtat birlikleri oplimallastırıp barıladı hám bul – turaqlı process bolıp esaplanadı.
Bunnan gózlengen tiykarǵı maqset – bir-birin tákirarlawshı funkciyalardı qısqartıw, mámleketlik basqarıw sisteması hám mámleketlik xızmetkerlerdiń jumıs nátiyjeliligin arttırıw, barlıq uyımlarda byudjet qarjılarınan aqılǵa uǵras hám únemlilik penen paydalanıwdı támiyinlew bolıp esaplanadı.
«Bul processtiń kólemi qay dárejede bolatuǵını, bul baǵdarda tiyisli úyreniw hám tallawlar ótkerilgennen keyin ǵana belgili boladı.
Sol sebepli, ǵalaba xabar quralları, blogerler hám sociallıq tarmaq paydalanıwshılarınan bul temaǵa baylanıslı xabarlardı tarqatıwda tek ǵana rásmiy dereklerge súyeniwdi soraymız», delinedi rásmiy múnásibette.

Qaraqalpaqstan xabar agentligi