Tashkent qalasında badminton boyınsha «Universiada–2025» sport jarıslarınıń final basqıshı bolıp ótti.

Jarısqa elimizdiń barlıq aymaqlarınan eń kúshli badmintonshılar qatnasıp, jeńimpazlıq ushın óz-ara gúres alıp bardı.
Eki kún dawam etken jarıslar juwmaǵında, ulıwma komandalıq esapta qaraqalpaqstanlı badmintonshılar Tashkent wálayatı komandasınan soń ekinshi orındı iyelewge miyasar boldı.
Atap aytqanda, jekpe-jek bellesiwlerde qızlar arasında Ózbekstan mámleketlik denetárbiya hám sport universiteti Nókis filialınıń studenti Húrziya Abdreymova, juplıq baskıshında Kazbek Maxambetov penen Ámir Dusanbaev, juplık qızlar arasında Shaxnoza Genjebekova hám Zarina Ataniyazovalar úshinshi orındı qolǵa kirgiziwge eristi.
Jarıs sońında jeńimpaz komandalar hám sportshılar shólkemlestiriwshiler tárepinen tayarlanǵan arnawlı diplom, medal hám estelik sawǵalar menen sıylıqlandı.
Jeńimpaz sportshılardı bul jarısqa Jannazar Qurbaniyazov, Raxat Beknazarov hám Niyetbay Ametovlar tayarladı.

Adilbay Orazov,
Qaraqalpaqstan xabar agentligi sholıwshısı