Sońǵı jılları elimizde Prezidentimiz basshılıǵında xalıqtıń jumıs penen bántligin támiyinlew, isbilermenlikti qollap-quwatlaw hám olarǵa keń imkaniyatlar jaratıw baǵdarında keń kólemli ilajlar ámelge asırılmaqta. Bunday qolaylıqlardan nátiyjeli paydalanıp kiyatırǵan isbilermenlerimiz bolsa, aymaqlarda óndiristi rawajlandırıp, xalıqtıń bántligin támiyinlemekte.
Shıǵısı xorezmli Xamidbek Qasimov ta usınday insanlardıń biri. 2002-jılı Nókiske Berdaq atındaǵı Qaraqalpaq mámleketlik universitetine oqıw maqsetinde kelgen, ol yuridika fakultetinde oqıp bilim aldı hám oqıwdı tamamlaǵannan soń bir neshe jıllar dawamında mámleketlik salıq inspekciyası tarawında juwapkerli wazıypalarda jumıs isledi. Biraq, ondaǵı qábilet hám umtılıs Xamidtiń bunnan keyingi turmıs jolın isbilermenlikke tutastırıp jiberdi.
Dáslep óziniń jigit aǵasınıń kárxanasında is basqarıwshı bolıp jumıs islegen ol, keyin ala 2017-jılı «Osiyo yoǵdusi» juwapkershiligi sheklengen jámiyetin ashıp, isbilermenlik penen shuǵıllana basladı.
-Prezidentimizdiń elimiz isbilermenlerine jaratıp bergen imkaniyatlarınan nátiyjeli paydalanıp, 2019-jılı investiciya kirgiziw shárti menen Nókis rayonı Samanbay awıl puqaralar jıyını aymaǵında bos turǵan «Qattıaǵar» MMTP ustaxanasın jámiyet balansına aldım,-deydi Xamidbek Qasimov.-Sońınan ustaxana imaratına kapital ońlaw jumısların júrgizip, ol jerge konditer ónimlerin islep shıǵaratuǵın zamanagóy úskenelerdi alıp kelip ornattıq. Bunnan soń kárxanamızǵa Tashkent qalasınan bul tarawda úlken tájiriybege iye jetik qánigelerdi alıp kelip, aymaqta usı tarawǵa qızıǵıwshı jaslardı qánigelerdiń járdeminde oqıtıp, olardıń is-tájiriybesin arttırdıq. Mine sonnan berli, Nókis hám Aqmańǵıt diyqan bazarlarına ózlerimizdiń ónimlerimizdi shıǵarıp, satıp atırmız.
Házirgi waqıtları Qıtay hám Iranda islep shıǵarılǵan zamanagóy texnologiyalar járdeminde on bir túrli konditer ónimlerin islep shıǵarıp atırǵan, bul kárxanada samanbaylı 9 jas jumıs islep atır.
-2015-jılı Nókis qalasındaǵı 2-sanlı medkolledjdi pitkerip, sonnan berli úyde jumıssız otırǵan edim,-deydi usınday jaslardıń biri Gúljáhan Arzieva.-2024-jıldıń sentyabr ayında usı kárxanaǵa jumısqa ótip, bul jerde ózim qatarlı qurbılarım menen jumıs islep atırman. Jumısımız saat 8:30 da baslanıp, 18:00 de tamamlanadı. Túski payıt usı jerde awqatlanamız. Bul jerde bizlerdiń ónimli jumıs islep, dem alıwımız ushın qolaylı sharayatlar jaratılǵan. Miynet haqımızdı da óz waqtında alıp turmız. Bunıń ushın jámiyet baslıǵı Xamid aǵaǵa úlken raxmet aytamız.
-Házirgi waqıtları kárxanamızda islep shıǵarılǵan ónimlerimizdi tek Nókis qalasına emes, al, Xorezm wálayatına da shıǵarıp satpaqtamız,-deydi Xamid Qasimov.
Keleshekte kárxanada islep shıǵarılatuǵın ónim túrlerin kóbeytip, jańa jumıs orınların ashıwdı maqset etken bul isbilermen, usı baǵdarda jańa joybarlar ústinde izleniwler alıp barmaqta.

Adilbay Orazov,
Qaraqalpaqstan xabar agentligi sholıwshısı