Prezident Shavkat Mirziyoevtiń basshılıǵında ótkerilip atırǵan videoselektor májilisinde sociallıq taraw shólkemleri de eksport jumısında jáne de belsene qatnasıwı zárúr ekenligi atap ótildi.

Ótken jılı «Medicinalıq xızmetler miymandoslıǵı» baǵdarlaması baslandı. Xirurgiya, dermatologiya, endokrinilogiya orayları sırt el puqaralarına xızmet kórsetiwden 1 million dollarǵa shekem qarjı túsirip atırǵan bolsa, 18 ilimiy orayda xızmetler eksportı 300 mıń dollarǵa jetpey atır.
Usı múnásibet penen 24 qánigelesken oraydıń medicinalıq xızmetler eksportın 30 million dollarǵa jetkeriw, Aziya rawajlanıw banki menen 5 qánigelesken oraydı jeke menshik basqarıwǵa beriliwin tezlestiriw áhmiyetli ekenligi atap ótildi.
Qońsı mámleketler menen shegaradaǵı postlarǵa jaqın aymaqta jaylasqan 60 emlewxanada ótken jılı 300 mıńnan aslam adamǵa medicinalıq xızmet kórsetilgen. Máselen, tek ǵana «Ayritom» xalıqaralıq sawda zonasında ashılǵan jeke menshik klinika ótken jıldıń ózinde 15 mıń sırt el puqarasına medicinalıq xızmet kórsetti.
Biraq 3 mámleket penen shegaralas, 7 bajıxana postı bolǵan Tashkent wálayatındaǵı shegara aldı aymaǵında hesh bir klinika joq. Namanganda da sonday jaǵday.
Sonıń ushın, wálayat hákimlerine qońsı mámleketler menen shegara aldı aymaqlarında 21 kóp tarmaqlı klinika shólkemlestiriwdi baslaw tapsırıldı.

ÓzA