Xalıqaralıq «Shegarasız shıpakerler» shólkemi menen birge islesiw óziniń unamlı nátiyjelerin bermekte,-dep xabar bermekte Densawlıqtı saqlaw ministrliginiń málimleme xızmeti.

Qaraqalpaqstan Respublikası Densawlıqtı saqlaw ministrligi hám xalıqaralıq «Shegarasız shıpakerler» shólkemi tuberkulyoz keselligin emlew boyınsha 1998-jıldan baslap birge jumıs alıp barmaqta.
DOTS+ baǵdarlaması 2003-jılǵa kelip respublikamız barlıq rayonların qamtıp aldı.
Tuberkulyoz keselliginde dárige turaqlılıqtı anıqlaw maqsetinde Respublika ftiziatriya hám pulmonologiya orayı laboratoriyasında 2003-jıldan baslap dárige sezimtallıqtı tekseriw jumısları jolǵa qoyıldı hám sol jıldan baslap dárige sezimtallıq testi nátiyjesi boyınsha emlew ushın DOTS+ baǵdarlaması boyınsha emlew baslandı.
Házirgi waqıtta Respublika ftiziatriya hám pulmonologiya laboratoriyasında zamanagóy laboratoriya jumıs islep turıptı. Xalıqaralıq «Shegarasız shıpakerler» shólkemi tárepinen ótken jıllar dawamında nawqaslardı úziliksiz dári menen támiyinlew ushın dári-darmaq hám laboratoriyalıq reaktivler menen turaqlı túrde támiyinlew ámelge asırılıp kelindi.
Tuberkulyoz keselliginde jańa emlew usılların qollanıw ushın, birgelikte 6 aylıq qısqa emlew usılı boyınsha klinikalıq izertlew jumısları alıp barılıp, nátiyjede bul usıl joqarı nátiyje kórsetkenligi sebepli pútkil dúnya júzine tuberkulyoz keselligin emlew ushın Dúnya júzilik densawlıqtı saqlaw shólkemi tárepinen usınıs etildi.
Házirgi waqıtta jumıs barısında anıqlanǵan mashqalalardı saplastırıw ushın ayına bir márte «Shegarasız shıpakerler» shólkemi qánigeleri hám Respublika ftiziatriya hám pulmonologiya orayı administraciyası menen májilis ótkerilip turıladı.
Birge islesiw nátiyjesinde respublikamızda tuberkulyoz keselligi menen keselleniw kórsetkishlerin bir qansha azaytıwǵa erisildi.

Qaraqalpaqstan xabar agentligi