Kadastr agentligi hám Mámleketlik kadastrlar palatası Qaraqalpaqstan Respublikası basqarmaları tárepinen ǵalaba xabar qurallarınıń wákilleri ushın baspasóz konferenciyası shólkemlestirildi.

Baspasóz konferenciyasında Kadastr agentligi Qaraqalpaqstan Respublikası basqarması baslıǵınıń orınbasarı P.Seytmuratov, Mámleketlik kadastrlar palatası Qaraqalpaqstan Respublikası basqarmasınıń baslıǵı S.Urunbaevlar shıǵıp sóylep, 2024-jıl dawamında ámelge asırılǵan ilajlar, atap aytqanda, nızamsız qurılmalardı anıqlaw, kóshpes múlkke bolǵan huqıqlardı mámleketlik dizimnen ótkeriw, kadastr pasportı rásmiylestiriwi, jerlerdi aukcionǵa shıǵarıw, arxiv isi tarawı boyınsha islengen jumıslar tuwralı maǵlıwmatlar berildi.
Atap ótilgenindey, Kadastr agentligi Qaraqalpaqstan Respublikası basqarması tárepinen jerlerdi ózbasımshalıq penen iyelew xám hújjetsiz imarat qurıw jaǵdayların anıqlaw boyınsha ótken 2024-jıl dawamında 4706 jaǵdayda 590,3 gektarlıq jer orınları ózbasımshalıq penen iyelengeni anıqlandı.
Sonnan, 3326 gektarda 480,7 jaǵday saplastırılıp, 1276 jaǵday (101,6 gektar) boyınsha sud uyımlarına dawa arzası kirgizilgen hám 80 jaǵday (8,5 gektar) boyınsha tiyisli hújjetler prokuratura uyımlarına jiberilgen.
Kóshpes múlkke bolǵan huqıqlardı mámleketlik dizimnen ótkeriw boyınsha 2024-jıl dawamında fizikalıq hám yuridikalıq táreplerden jámi 114 mıń 617 arza (buyırtpa) qabıl etildi. Sonnan 29 mıń 657 arza belgili sebeplerge bola biykar etilgen, 5483 arza kórip shıǵılmaqta, 79 477 fizikalıq hám yuridikalıq tárepke xızmetler kórsetildi.
Kóshpes múlk obyektlerine kadastr pasportın rásmiylestiriw boyınsha
2024-jılı fizikalıq hám yuridikalıq tárepler jaǵınan jámi 111344 arza kelip túsken. Sonnan 75270 arza juwmaqlanǵan. 31027 arza biykar etilgen, 759 arza kórip shıǵılmaqta, 3663 arza tólem procesinde.
Isbilermenlik hám qala qurılısı jumısların ámelge asırıw ushın jer uchastkaların múlk huqıqı hám ijara huqıqı tiykarında elektron onlayn-aukcion arqalı beriw boyınsha 194,31 gektar maydanda 3722 jer uchastkası “E-auksion” sawda maydanshasında satıwǵa qoyılıp, 384 jer uchastkası realizaciyalanǵan.
Jeke tártipte turaq jay qurıw hám turaq jayın abadanlastırıw ushın jer uchastkaların elektron onlayn-aukcion arqalı realizaciyalaw boyınsha, jámi 9212 jer uchastkası aukcionda satıwǵa shıǵarılǵan, 5920 jer uchastkası “E-auksion”da realizaciyalanǵan.
Filiallardıń arxivinde jámi 476081 dana fizikalıq hám yuridikalıq táreplerge tiyisli bolǵan kadastr hújjetleriniń jıymaları bar. Bul arxiv hújjetleri reje-grafik tiykarında xatlawdan ótkerilip, Qaraózek, Ámiwdárya, Shomanay, Bozataw hám Taxtakópir rayonları filiallarında arxiv hújjetlerin nomerler boyınsha 85442 hújjettiń qayta tártiplestiriw jumısları juwmaqlandı.
Ámiwdárya hám Nókis qalası filiallarına jámi 47 zamanagóy mobil stellajalar ornatıldı. Bul hújjetlerdiń ayrıqsha jaǵdaylar júz bergende, suw tasqınları hám basqa da hádiyselerden qáwipsiz, uzaq múddetke saqlanıwı, keleshek áwladqa sapalı halda jetkerip beriwin támiyinleydi.
Sonday-aq, Qaraqalpaqstan Respublikasında bar bolǵan 476 081 dana kadastr hújjetlerinen 472321 hújjet skanerden ótkerilip NexCloud sistemasına kirgizildi. Kadastr nomerleri boyınsha tártiplestiriwde hújjetlerdi ańsat hám tez tabıw, sonıń menen birge, elektron nusqalarınıń jıllar dawamında saqlanıwı támiyinlenedi.
Baspasóz konferenciyasında qatnasıwshılar pikir-usınısların bildirip, basqarmadaǵı zamanagóy mobil stellajalardı kórip, jerlerdi ózbasımshalıq penen iyelew xám hújjetsiz imarat qurıw jaǵdayları, isbilermenlik penen shuǵıllanıw ushın jer maydanın alıw tártip-qaǵıydaları, NexCloud sisteması hám basqa da máseleler boyınsha qızıqtırǵan sorawlarına juwap aldı.

Á.Jiyemuratov,
Qaraqalpaqstan xabar agentligi.