Elimizdegi ekologiyalıq jaǵdaydı jaqsılaw maqsetinde «Jasıl mákan» ulıwmamilliy joybarı ámelge asırılıp, aymaqlarda mıńlaǵan terek hám puta nállerin egiw akciyaları ámelge asırılıp kelinbekte.

Juwmaqlanǵan 2024-jılı hám «Jasıl mákan» ulıwma milliy joybarı sheńberindegi ilajlar keń kólemde ámelge asırılıp, bunıń ushın Mámleketlik byudjetten 100 milliard sum qarjı ajıratılǵan. Bul qarjılardıń 52 milliard sumı «Ashıq byudjet» portalı arqalı «Meniń baǵım» joybarın jetilistiriwge, 48 milliard sumı basqa kóklemzarlastırıw ilajları ushın baǵdarlanǵan.
Usı qarjılar esabınan respublikanıń 208 rayonında «Meniń baǵım» joybarı sheńberinde «Jasıl baǵ» hám «Jasıl jámiyet park»leri qurılmaqta. Bunnan tısqarı, 445 gektar maydanda jasıl baǵlar hám kóklemzarlastırıw ilajları ámelge asırılǵan.
Bul haqqında Oliy Majlis Nızamshılıq palatasındaǵı Ózbekstan Еkologiyalıq partiyasınıń frakciyası hám Еkologiya hám qorshaǵan ortalıqtı qorǵaw máseleleri komitetiniń keńeytilgen májilisinde atap ótildi. Onda Еkologiya, qorshaǵan ortalıqtı qorǵaw hám klimat ózgeriwi ministrliginiń «2024-jıl ushın Mámleketlik byudjet qarjılarınan paydalanıw menen baylanıslı maqsetli indikatorlarınıń orınlanıwı haqqında»ǵı málimlemesi tıńlandı.
Atap ótilgenindey, hár jılǵı Mámleketlik byudjettiń maqsetli jumsalıwı boyınsha ekologiya hám qorshaǵan ortalıqtı qorǵaw tarawında da sistemalı jumıslar ámelge asırılmaqta. Atap aytqanda, ótken jılı shól, tawlı hám taw aldı aymaqlarda shólleniw hám qum kóshiwi, topıraqtıń suw hám samal eroziyasınıń aldın alıw hám ekologiyalıq ortalıqtı jaqsılaw maqsetinde 1 mıń 887 gektar qorǵaw toǵayları (ixota) qurıldı.
Dodalawlar dawamında deputatlar Mámleketlik byudjetten maqsetli indikatorlar ushın ajıratılǵan qarjılardıń tolıq ózlestirilmegeni boyınsha qarsılıq bildirdi. Sonıń menen birge, byudjet qarjılarınan nátiyjeli paydalanǵan halda, tábiyattı qorǵaw ilajlarınıń orınlanıwın támiyinlew boyınsha óz usınıs hám pikirlerin bildirdi.

Muhtarama Komilova, ÓzA