Qıtaydıń Xarbin qalasında Aziya Olimpiada keńesi (AOK)niń 93 atqarıw komitetiniń májilisi bolıp ótti. Májiliste AOK vice-prezidenti, Ózbekstan Milliy olimpiada komiteti baslıǵınıń birinshi orınbasarı Otabek Umarov qatnastı.

Ilaj aldında Xarbin qalası meriyasınıń wákili miymanlardı kútip alǵanınan quwanıshlı ekenin bildirip, qısqı Aziya oyınlarında qatnasıp atırǵan sportshılarǵa áwmet tiledi. Ánjuman dawamında «Aichi-Nagoya-2026» jazǵı Aziya hám 2029-jıl Saudiya Arabstanında shólkemlestiriletuǵın kelesi qısqı Aziya oyınlarına tayarlıq boyınsha prezentaciyalar ótkerildi.
«Xarbin-2025» qısqı Aziya oyınlarınıń baǵdarlamasınan 11 sport túri orın alǵan bolıp, házirgi kúnde kyorling hám xokkey baǵdarlarındaǵı saylap alıw jarısları dawam etip atırǵanın aytıp ótiw kerek. Ózbekstan sportshıları dáslep oyınlar baǵdarlamasınan orın alǵan short-trek jarıslarında óz áwmetin sınaqtan ótkeredi.
Esletip ótemiz, 14-fevralǵa shekem dawam etetuǵın «Xarbin-2025» qısqı Aziya oyınlarınıń 6 sport túrinde 24 sportshımız Watanımızdıń abırayın qorǵaydı.

T.Rwziev, ÓzA