Oliy Majlis Senatı janındaǵı Jaslar parlamentiniń birinshi májilisi bolıp ótti.

Senat Baslıǵı Tanzila Norboeva qatnasqan májiliste ótken bes jılda Jaslar parlamentiniń aǵzaları barlıq baǵdarlarda senatorlar menen iyinles bolıp tájiriybe arttırǵanı, belgili nátiyjelerge erisip, zárúr struktura ekenin dálillengeni atap ótildi.
Onıń ámeliy kórinisin 2 Jaslar parlamentleri aǵzasınıń Nızamshılıq palatasına deputat, 20sı bolsa jáne bir márte xalıq isenimine erisip, jergilikli keńesler deputatları etip saylanǵanında kóriw múmkin.
Jaslar parlamentiniń wákillik múddeti tamamlanıwı múnásibeti menen onıń jańalanǵan quramı qáliplestirildi. Islep shıǵılǵan rejege bola, onıń quramı jergilikli keńeslerdiń usınısı tiykarında 84i otız jasqa shekemgi deputattan, 10ı Jaslar isleri agentligi hám 6sı Senattıń tiyisli komitetiniń usınısına tiykarlanıp qáliplestirilgen. Jaslar parlamentiniń 100 den ibarat jańa quramı tastıyıqlandı.
Házirgi komandanıń 13i túrli mámleketlik sıylıqlar menen sıylıqlanǵan, 11i sırt eldiń joqarı oqıw orınların tamamlaǵan. Quramnıń 95 procenti joqarı maǵlıwmatlı jaslar hám 30 procentin hayal-qızlar quradı.
Jańa quram huqıqtanıwshılar, ekonomistler, pedagoglar, isbilermenler, ekologlar hám mádeniyat, sport hám densawlıqtı saqlaw tarawları wákillerinen quralǵanı olardıń barlıq baǵdarlarda nátiyjeli jumıs alıp barıwına xızmet etedi.
Májiliste shólkemlestiriw máselesi kórip shıǵıldı. Laylo Aslonova Jaslar parlamenti baslıǵı etip saylandı. Sonday-aq, Ibrohimjon Jwraboev hám Azizbek Ochilboev Jaslar parlamenti baslıǵınıń orınbasarları etip saylandı. Sonday-aq, Jaslar parlamenti komissiyalarınıń baslıqları hám olardıń aǵzaları da saylandı.
Shólkemlestiriw máselesinen soń Senat Baslıǵı óziniń shıǵıp sóylegen sózinde Jaslar parlamenti óz jumısında itibar qaratıwı zárúr bolǵan tiykarǵı wazıypalarǵa toqtap ótti. Atap aytqanda, nızam dóretiwshiligi procesinde belsene qatnasıw, jaslarǵa baylanıslı nızamlardı jetilistiriw boyınsha usınıslar beriw, orınlarda jaslar bántligi máselesin puxta úyreniw hám sistemalı mashqalalardı anıqlaw hám saplastırıwǵa járdem beriw áhmiyetli ekenligi atap ótildi.
Bunnan tısqarı, Jaslar parlamenti jaslar arasındaǵı jınayatshılıq, balalar hám hayal-qızlarǵa zorlıq-zombılıq jaǵdaylarınıń aldın alıw boyınsha úgit-násiyatlaw ilajlarında belsene qatnasıwı, sırt mámleketlerdiń jaslar parlamentleri menen birge islesiwi hám óz-ara tájiriybe almasıwı zárúr ekenligine de áhmiyet qaratıldı.

N.Abduraimova, ÓzA