Ózbekstan Respublikası Oliy Majlis Senatı ilim, bilimlendiriw hám densawlıqtı saqlaw máseleleri komiteti baslıǵınıń orınbasarı, senator O. Ataniyazova hám Qaraqalpaqstan Respublikası Joqarǵı Keńesiniń komitet baslıǵı Sh. Ótemisov Qaraózek rayonında hákimliktiń juwapker xızmetkerleri, deputatlar, máhálle jetiligi aǵzaları menen ushırastı.
Ushırasıwda senator O. Ataniyazova shıǵıp sóylep, Senattıń ekinshi hám úshinshi jalpı májilisinde maqullanǵan nızamlar hám kórip shıǵılǵan máselelerdiń áhmiyetin túsindirdi.
Sonday-aq, senator rayondı sociallıq-ekonomikalıq rawajlandırıw baǵdarında isleniw tiyis wazıypalar boyınsha tiyisli taraw wákilleriniӊ juwapkershiligin arttırıw baǵdarında óz usınısların berip ótti.
Bunnan soń senator O. Ataniyazova, Qaraqalpaqstan Respublikası Joqarǵı Keӊesiniń komitet baslıǵı Sh. Ótemisov hám jergilikli Keӊes deputatları birgelikte Quralpa awıl puqaralar jıyını turǵınları menen ushırasıp, aymaqtaǵı sheshimin kútip turǵan mashqalalardıӊ óz waktında orınlanıwın támiyinlew boyınsha mámleketlik baǵdarlamalarǵa usınıs kirgiziw hám onıń orınlanıwı boyınsha juwapker tarawlardıӊ jumısların bunnan bılay da jedellestiriw boyınsha kórsetpeler berdi.
Ilajda aymaq turǵınları senatorǵa elatta ushırasıp atırǵan ayrım máseleler boyınsha óz usınısların bildirip, oǵan tiyisli juwaplar aldı.

Adilbay Orazov,
Qaraqalpaqstan xabar agentligi sholıwshısı