Búgingi kúni insan qádiri joqarı qádiriyat esaplanǵan elimizde xalqımızdıń abadan turmısta jasawın támiyinlew baǵdarında bir qatar unamlı ilajlar ámelge asırılıp, aymaqlardı sociallıq-ekonomikalıq jaqtan rawajlandırıw boyınsha kóplegen jumıslar ámelge asırılmaqta. Ásirese, Prezidentimizdiń arnawlı párman hám qararları tiykarında Qaraqalpaqstanda ámelge asırılǵan jańalanıw hám ózgerisler maqtawǵa ılayıq. Degen menen, bul baǵdarda ámelge asırılıwı tiyis wazıypalar da barshılıq.
Qaraqalpaqstan Respublikası Joqarǵı Keӊesiniӊ komitet baslıǵı Sh.Ótemisovtıń basshılıǵında máhállelerdi hár tárepleme qollap-quwatlaw, aymaqlarda ámelge asırılǵan ilajlar, ushırasıp atırǵan mashqalalar hám hayal-qızlardıń ekonomikalıq, sociallıq hám siyasiy belsendiligin arttırıw baǵdarında orın alǵan áhmiyetli wazıypalarǵa arnalǵan májilis ótkerildi.
Onda Qaraqalpaqstan Respublikası Ministrler Keńesi Baslıǵınıń orınbasarı – Shańaraq hám hayal-qızlar komitetiniń baslıǵı M.Axmedova hám basqa da ministrlik, mákemelerdiń basshıları, juwaplı xızmetkerler, qala hám rayon studiyalarınan tiyisli taraw basshıları qatnastı.
Dáslep, húrmetli Prezidentimizdiń Qaraqalpaqstanǵa ayrıqsha itabarı, sonıń ishinde awıl-aymaqlardı rawajlandırıw, olardıń infrastrukturasın jaqsılaw baǵdarında qabıl etilgen bir qatar párman hám qararlarınıń áhmiyeti, xalıqtı kámbaǵallıqtan shıǵarıw, joqarı dáramat alıw, isbilermenlikti rawajlandırıw, jasıl energetikanı keńnen en jaydırıw baǵdarındaǵı belgilengen wazıypalar hám jaratılǵan sharayatlar keń túrde atap ótildi.
Májiliste sonday-aq, usınday keń imkaniyatlardıń jaratılıp berilgenligine qaramastan, ayırım orınlarda taraw hám jıyın basshılarınıń óz wazıypasın atqarıwǵa nemquraydılıq penen qarap, qáte-kemshiliklerge jol qoyıp atırǵanı sınǵa alındı. Májilis kún tártibindegi máseleler boyınsha máhállede abadanlastırıw jumısları, tınıshlıqtı saqlaw, jınayatshılıqtıń aldın alıw, hayal-qızlarımızdıń jámiyettegi ornın arttırıw, shańaraqlarda ajırasıwlardıń aldın alıw, jaslarımızdı bárkamal áwlad etip tárbiyalawda máhálleler jetilikleriniń ornı ayrıqsha ekenligine atap ótilip, tiyisli wazıypalar belgilendi.

Qaraqalpaqstan xabar agentligi