Malayziyanıń Linkoln Kolleg universitetinde birgeliktegi baǵdarlama tiykarında oqıp atırǵan student-jaslar menen Berdaq atındaǵı Qaraqalpaq mámleketlik universitetiniń rektorı, akademik A.Reymov ushırasıw ótkerdi hám sáwbetlesti. Ushırasıwlarda A.Reymov olardıń oqıw sharayatları, keleshektegi rejeleri hám oqıw processleri menen jaqınnan tanısıp, usınısları menen ortaqlastı.
Berdaq atındaǵı Qaraqalpaq mámleketlik universiteti menen Linkoln Kolleg universiteti arasında bilimlendiriw tarawındaǵı birge islesiwdi jáne de bekkemlewge xızmet etetuǵın bul birgeliktegi tálim baǵdarlamasınan gózlengen tiykarǵı maqset – xalıqaralıq tájiriybege iye qánigeler tayarlaw.
Akademik A.Reymov shıǵıp sóylegen sózinde, eki joqarı oqıw ornı arasındaǵı birge islesiwdiń nátiyjeleri, studentler ushın jaratılǵan imkaniyatlar haqqında aytıp, Linkoln Kolleg universiteti jámáátine minnetdarshılıq bildirdi.
Ushırasıwda eki tárepleme birge islesiwdi bunnan bılay da rawajlandırıw, akademiyalıq almasıw baǵdarlamaların keńeytiw, ilimiy-izertlew tarawında birge islesiw máseleleri dodalanıp, studentlerge sapalı bilim beriw hám olardıń mamanlıǵın arttırıw baǵdarında birgelikte jumıs alıp barıwǵa kelisip aldı.
Malayziyada bilim alıp atırǵan jaslar keleshektegi bilimlendiriw hám kásiplik jumısında ayrıqsha áhmiyetke iye bolıp, eki universitet arasındaǵı akademiyalıq birge islesiwdi jańa basqıshqa alıp shıǵıwǵa xızmet etedi.

Qaraqalpaqstan xabar agentligi