Fevral ayı jaslar arasında náshebentlik hám psixotrop zatlardıń tarqalıwınıń aldın alıw aylıǵı bolıp, aylıq sheńberinde orınlarda keń túrde úgit-násiyat ilajları shólkemlestirilmekte.

Ájiniyaz atındaǵı Nókis mámleketlik pedagogikalıq institutında bolıp ótken ushırasıwda Ózbekstan Respublikası Prezidenti Administraciyası janındaǵı Náshebentlik zatlardı qadaǵalaw Milliy orayınıń bas ilimiy xızmetkeri Jánibek Yusupov, Ózbekstan Respublikası Ruwxıy salamatlıq bóliminiń baslıǵı Jura Toirov, Qaraqalpaqstan Respublikası Ruwxıy salamatlıq orayınıń narkolog vrachı Bóribay Qayıpnazarovlar tárepinen náshebentlik hám psixotrop zatlardıń zıyanlı aqıbetleri haqqında jaslarǵa keń túrde túsinikler berildi, deydi NMPI baspasóz xatkeri I.Mátekov.
– Náshebentlik hám psixotrop zatlar mashqalası búgingi kúnniń eń global hám áhmiyetli mashqalalarınıń biri, – dedi óziniń shıǵıp sóylegen sózinde instituttıń jaslar máseleleri, ruwxıylıq hám aǵartıwshılıq isleri boyınsha birinshi prorektorı wazıypasın waqıtsha atqarıwshısı Q.Reymov.
Bul illettiń jaslar arasında keńnen tarqalıwı jámiyetimiz ushın úlken qáwip tuwdıradı. Onıń aldın alıw hám jaslardı zıyanlı illetlerden saqlap qalıw ushın túsinik hám úgit-násiyatlaw jumısların arttırıwdıń áhmiyeti atap ótildi.
Náshebentlik hám psixotrop zatlardan paydalanıw tek ǵana insannıń fizikalıq salamatlıǵına keri tásirin tiygizip qoymastan, ruwxıy salamatlıǵı hám jámiyetlik turmısında da ornı tolmas joǵaltıwlarǵa alıp keledi.
Ushırasıwda student-jaslar ózlerin qızıqtırǵan sorawlarǵa qánigelerden tolıq juwap aldı.
Ilajda shıǵıp sóylegenler bul mashqalanıń aldın alıw ushın jámiyettiń barlıq qatlamları, sonıń ishinde, ata-analar, pedagog xızmetkerler, mámleketlik hám mámleketlik emes shólkemler birgelikte jumıs alıp barıwı kerek ekenin atap ótti.

Qaraqalpaqstan xabar agentligi