Ózbekstan delegaciyasınıń Malayziyaǵa xızmet saparı dawamında birge islesiwshi mámleket penen aqıllı awıl xojalıǵı texnologiyaları hám dronlar islep shıǵarıw, salıgershilik, balıqshılıq, kauchuk jetistiriw, miywe-ovosh hám pille ónimlerin eksport etiw sıyaqlı baǵdarlarda ámeliy birge islesiw jumısların baslawǵa kelisip alındı.
Atap aytqanda, Malayziyanıń Meraque kompaniyası menen birgelikte Tashkent wálayatınıń Yangiywl rayonındaǵı Awıl xojalıǵın mexanizaciyalastırıw ilimiy-izertlew institutı aymaǵında aqıllı awıl xojalıǵı texnikaları hám dronlardı lokalizaciyalastırılǵan halda islep shıǵarıw boyınsha kelisimge qol qoyıldı.
Bunnan tısqarı, Malayziya Awıl xojalıǵı ministrligi janındaǵı Awıl xojalıǵında bilim hám innovaciyalar orayı arasında qol qoyılǵan kelisim tiykarında malayziyalı selekcioner ilimpazlar tárepinen jaratılǵan shorlanǵan hám suwsızlıqqa shıdamlı, qara, uzın hám aromatlı salı nállerin Ózbekstanda tájiriybe sıpatında egip kóbeytiw ushın tuqımlar alıp kelinedi. Sonıń menen birge, Ózbekstanda jetistirilgen «devzira» salı tuqımları Malayziyaǵa jiberiledi.
Malayziya Awıl xojalıǵı hám azıq-awqat qáwipsizligi ministrliginiń Balıqshılıq departamenti hám «Ózbekbalıqsanaat» basqarması menen birgelikte Ózbekstanda Malayziyanıń jańa texnologiyaları tiykarında intensiv balıqshılıq, bioflok hám krivetka jetistiriw joybarları jolǵa qoyıladı.
Malayziya Awıl xojalıǵı marketing agentligi menen birge islesiwdi rawajlandırıw arqalı Ózbekstanda jetistirilgen miywe-ovosh hám pille ónimlerin eksport etiw jolǵa qoyıladı.
Sonday-aq, Malayziyanıń Jakim shólkemi menen birgelikte Ózbeksanlı fermerler hám isbilermenler ushın «Hadal» sertifikatın alıw maqsetinde oqıw kursların shólkemlestiriw boyınsha kelisimge erisildi.
Bolıp ótken ilajlarda Ózbekstan hám Malayziya arasındaǵı bul birge islesiw joybarları eki mámleket awıl xojalıǵı tarawınıń innovaciyalıq rawajlanıwına hám ónimler eksportın keńeytiwge xızmet etetuǵını atap ótildi.

ÓzА