Mámleketimizde hayal-qızlardıń turmıs hám miynet sharayatların jaqsılaw, olarǵa baylanıslı sociallıq mashqalalardı sheshiwge tiykarǵı áhmiyet qaratılmaqta. Olardıń turmıslıq maqsetleri hám qádiriyatları jámiyet, mádeniyat, jeke tájiriybe, zamanagóy tendenciyalar hám házirgi sharayatlar tásirinde forması jaǵınan jańa kórinislerde kózge taslanbaqta.
Shańaraq hám gender ilimiy-izertlew institutınıń jámááti tárepinen hayal-qızlar arasında olardıń turmıslıq maqsetleri, qádiriyatları hám mashqalaların úyreniw maqsetinde sociologiyalıq sorawlar ótkerildi. Olarda mámlekettiń 8 aymaǵında jasawshı 547 hayal-qız qatnastı.
Hayal-qızlardıń bántligi qala hám awıl aymaqlar kesiminde úyrenilgeninde hár besinshi hayal-qız mámleketlik shólkemlerde jumıs alıp baratuǵını hám qala aymaǵında jasawshılar arasında olardıń úlesi biraz kóp ekenligi (23 procent) anıqlandı.
Sońǵı jılları mámlekette hayal-qızlardı qollap-quwatlaw hám gender teńligi máselelerine kún sayın itibar qaratılmaqta. Izertlew nátiyjelerinde jámiyette erkek hám hayaldıń teń huqıqlı ekenligin támiyinlew áhmiyetli másele ekenligin qollap-quwatlawshı hayal-qızlardıń úlesi ortasha 49,8 procentti quradı.
Izertlew nátiyjelerine bola, jámiyettegi ayırım hayal-qızlar (80,6 procent) oqıw hám onı dawam ettiriwdi áhmiyetli dep esaplaydı. Atap aytqanda, olardıń 62,6 procenti joqarı maǵlıwmatqa iye bolıwdı oǵada áhmiyetli, hár besinshisi bolsa (18 procenti) kóp tárepleme áhmiyetli ekenligin atap ótti.
Sorawda qatnasqanlardıń 72 procentke shamalası ekonomikalıq abadanlıq ushın oǵada áhmiyetli ekenligin, besewden birewi (19,4 procent) kóp tárepleme áhmiyetli ekenligin atap ótken.
Hayal-qızlardıń salamat turmıs tárizine ámel etiwi olardıń insan salamatlıǵın qay dárejede qádirlewi máselesi menen úzliksiz baylanıslı. Alınǵan maǵlıwmatlarǵa bola, hayal-qızlardıń ayırımları salamat turmıs keshiriw hár bir insan ushın oǵada áhmiyetli ekenine isenedi.

M.Toshqoraeva, ÓzA