Qońırat rayonında “Basqarıw uyımları, Ayrıqsha jaǵdaylar boyınsha mámleketlik strukturalardıń ayrıqsha jaǵdaylardı saplastırıw boyınsha háreketleri” atamasında Komandalıq-shtab oqıw-shınıǵıwları bolıp ótpekte.

Dáslep, oqıw-shınıǵıw rejesine muwapıq, Puqaralıq qorǵanıw shtabına rayondaǵı sektor basshılarına, mákeme-kárxana hám shólkem basshılarına “JÍYÍN” signalı berildi.
Hákimliktiń májilisler zalında rayon hákimi B.Madaminovtıń basshılıǵında juwaplı xızmetkerlerdiń esabatı tıńlanıp, komandalıq-shtab oqıw-shınıǵıwlarınıń wazıypaları kelisip alındı.
Maqset – tábiyǵıy hám texnogen kórinistegi ayrıqsha jaǵdaylar júz bergende tiyisli uyımlardıń tayarlıq dárejesin sınaqtan ótkeriw hám birgeliktegi háreketlerin jetilistiriw.
Ilaj dawamında sap kózden ótkeriwi bolıp ótti.
Onda «Jıyın komandası»nıń hám Ayrıqsha jaǵdaylar boyınsha mámleketlik tómengi strukturalardıń rayonlıq buwını xızmetleriniń jeke quramı, jumısshıları, ásbap-úskeneleri, texnikalarınıń jaǵdayı hám jeke quramnıń bilim hám kónlikpeleriniń ayrıqsha jaǵdaylarǵa tayarlıǵı sınaqtan ótkerildi. Ilajǵa jámi 237 adam hám 68 texnika quralları tartıldı.
Soń oqıw-shınıǵıw sheńberindegi ilajlar rayondaǵı 43-sanlı mektepte «Puqaralıq qorǵanıw kúni» ilajı menen dawam etti.
Ulıwma bilim beriw mektepleri hám mektepke shekemgi bilimlendiriw mákemeleriniń basshıları hám muǵallimleriniń qatnasıwında ótkerilgen kórgizbeli ilajda, jámi 653 muǵallim hám oqıwshılar, 3 avtotransport quralları qosıldı.
Soń ilaj jer silkiniwi júz bergende evakuaciyalanatuǵın puqaralardı jıynaw punkti jaylasqan 35-sanlı mektepte dawam etti. “Azatlıq” MPJ turǵınların, olardıń múlkin hám sharwa malların qáwipsiz aymaqqa kóshiriw boyınsha ótkerilgen arnawlı-taktikalıq oqıw shınıǵıwı dawamında 35-sanlı mekteptegi “Kóshiriletuǵınlardı jıynaw punkti”nde hám Qońırat aymaqlıq temirjol uzelinde xalıqtı temirjol transportı arqalı evakuaciyalaw ilajları ámelge asırıldı.
Onda usınday ayrıqsha jaǵdaylarda puqaralıq qorǵanıw strukturalarınıń birgeliktegi háreketleri ámelge asırılıp, kónlikpeleri arttırıldı.
Shınıǵıwlar barısında 6,7 ballıq jer silkiniwi júz bergen waqıtta aymaq turǵınlarına qanday járdemler beriw boyınsha barlıq ilajlar kórilip, evakuaciyalanǵan puqaralardı jıynaw hám qabıllaw punktiniń ámeliy háreketleri kórsetildi.
Qońırat temir jol vokzalında jer silkiniwi menen baylanıslı ayrıqsha jaǵdaylar júz bergende xalıqtı temir jol transportı arqalı evakuaciyalaw ilajları da ámelge asırıldı.
Komandalıq-shtab oqıw-shınıǵıwları dawam etip, «Jińishke” mákan puqaralar jıyınında puqaralardıń botulizm keselliginen hám gazdiń záhárli iyisinen zıyanlanıw jaǵdayları júz bergende durıs háreketleniwi boyınsha oqıw-shınıǵıw ilajları ámelge asırıldı. Oqıw shınıǵıwına jámi 57 adam hám 8 texnika tartıldı.
Oqıw shınıǵıwı dawamında “Taqıyatas Neft baza” JShJ Qońırat rayonı filialında ayrıqsha jaǵdaylar júz bergende obyekt basshıları, puqaralıq qáwipsizlik strukturaları hám rayonlıq AJMS xızmetleriniń birgeliktegi háreketleri temasında arnawlı-taktikalıq oqıw-shınıǵıwı ótkerilip, oǵan jámi 147 adam hám 14 texnika tartıldı.
5-7-fevral kúnleri ótkerilip atırǵan komandalıq shtab oqıw-shınıǵıwı dawamında “Qońırat diyqan bazarı” JShJda órtler menen baylanıslı ayrıqsha jaǵdaylardı saplastırıwda AJMS xızmetleriniń birgeliktegi háreketleri temasında arnawlı-taktikalıq oqıw-shınıǵıwı da ótkerildi. Ilajǵa jámi 75 adam hám 12 texnika quralları tartıldı.
Oqıw-shınıǵıwı sheńberindegi ilajlar dawam etpekte.

Qaraqalpaqstan xabar agentligi