Ózbekstannıń Ullı Britaniyadaǵı elshisi Ravshan Usmanov jańadan tayınlanǵan mámleket Bas ministriniń Ózbekstan boyınsha sawda wákili lord Jon Olderdis penen ushırasıw ótkerdi.

«Dunyo» basılımınıń jazıwınsha, Britaniya Bas ministriniń Sawda wákilleriniń lawazımı 2012-jılı engizilgen bolıp, bul orınǵa mámleket parlamentiniń jetekshi ǵayratkerleri tayınlanadı.
Sawda wákilleri tek Birlesken Patshalıq penen sawda hám investiciyalıq birge islesiwdi jáne de rawajlandırıw imkaniyatı bar bolǵan mámleketlerge tayınlanadı hám olardıń tiykarǵı jumısı bul tarawlardaǵı qatnasıqlardı kúsheytiwge baǵdaralanadı.
Atap aytqanda, sawda wákilleri Britaniya Sawda hám biznes ministrligi menen tıǵız birge islesiwde jańa bazarlardı payda etiw, sırt mámleketlerde biznes missiyaların shólkemlestiriw hám Britaniya hám sırt elli isbilermen toparları arasında qatnasıqlardı jedellestiriw máseleleri menen shuǵıllanadı.
Sóylesiw dawamında sırt elli tárep Jańa Ózbekstanda ámelge asırılıp atırǵan keń kólemli reformalar hám sońǵı jıllarda respublikanıń sawda-ekonomikalıq, siyasiy, sociallıq hám mádeniy tarawlarda erisken jetiskenlikleri menen tolıq tanıstırıldı.
Lord Jon Olderdis Ózbekstanda júz berip atırǵan jańalanıw hám ózgerislerdi unamlı bahalap, rásmiy Londondı Tashkent penen barlıq tarawlarda qatnasıqların keńeytiwden mápdar ekenin atap ótti.
Sóylesiw waqtında sawda-ekonomikalıq hám investiciyalıq jáne bilimlendiriw tarawlarında birge islesiwdi jánede keńeytiw máseleleri boyınsha pikir alısıldı.
Ushırasıw juwmaǵında eki mámleket arasındaǵı birge islesiwdi jáne de keńeytiw ushın bar potencialdı ámelge asırıw boyınsha sóylesiwdi dawam ettiriw haqqında kelisimge erisildi.

Qaraqalpaqstan xabar agentligi