Statistikalıq maǵlıwmatlarǵa qaraǵanda, respublikamız boyınsha usaqlap satıw tovar aylanısı ótken jıldıӊ yanvar-dekabr aylarında 13 trln. 683 mlrd. 668,2 mln. sumdı qurap aldınǵı jıldıӊ usı dáwirine salıstırǵanda 108,3 procentke artqan.

Usaqlap satıw tovar aylanısı kóleminde úlken úleske iye bolǵan Nókis qalası (25,5 %), Tórtkúl (13,1 %), Xojeli (8,6 %) Beruniy (7,6 %) hám Ámiwdárya (6,6 %) rayonları usaqlap satıw tovar aylanısınıӊ ósiwine unamlı tásirin kórsetken.
– Kishi biznes subyektleriniӊ mámleketimiz ekonomikasınıӊ rawajlanıwına qosıp atırǵan úlesi, islep shıǵarıp atırǵan ónimleri, kórsetilip atırǵan xızmetleriniӊ barlıǵı statistikalıq esabatlar arqalı kórsetiledi,-deydi Statistika basqarması sırtqı ekonomiklıq baylanıs hám sawda statistikası bóliminiń baslıǵı Polatbek Boranbaev.
Qaraqalpaqstan Respublikasında usaqlap satıw tovar aylanısı xalıqtıń jan basına 6786,9 mıӊ sumdı qurap, 106,9 procentke arttı. Ortasha jan basına tovar aylanısıӊ eӊ joqarı kórsetkishleri Nókis qalası, Qaraózek, Taxtakópir, Xojeli rayonlarında baqlandı.
Prezidentimiz hám Húkimetimiz tárepinen kishi isbilermenlik subyektlerin qollap-quwatlaw boyınsha alıp barılıp atırǵan siyasat tásirinde olardıӊ ekonomikamızdaǵı tutqan ornı anaǵurlım ósti.
2024-jıldıń yanvar-dekabr ayları jaǵdayına kishi isbilermenlik subyektleriniӊ tovar aylanısı aldınǵı jıldıӊ usı dáwirine salıstırǵanda 108,6 procent boldı. Ulıwma usaqlap satıw tovar aylanısında kishi isbilermenlik subyektleriniӊ úlesi 97,3 procentti quradı. Kishi isbilermenlik subyektleriniӊ usaqlap satıw tarawındaǵı úlesi de salmaqlı boldı.

Qaraqalpaqstan xabar agentligi