BMShtıń Narkotikler hám jınayatshılıq boyınsha basqarmasınıń Awǵanstan, Oraylıq Aziya, Pakistan hám Irandaǵı regionallıq wákili Oliver Shtolpe Ózbekstan Respublikası Oliy Majlisi Senatına bardı.

Senat Baslıǵı Tanzila Norboeva menen ushırasıwda Ózbekstan hám BMShtıń Narkotik hám Jınayat máseleleri boyınsha awqamı arasındaǵı birge islesiw, ásirese, nızamsız narkotik aylanısı, shólkemlesken transmilliy jınayatshılıq, adam sawdası hám terrorizmge qarsı gúres jańa basqıshqa kóterilgeni aytıp ótildi.
Sonday-aq, regionda insan huqıqları ústinligin hám gender teńlikti támiyinlew, múnásip miynet sharayatların jaratıw, korrupciya hám adam sawdasına qarsı gúresiwde parlamenttiń tutqan ornı hár tárepleme dodalandı.
Sonıń menen birge, sóylesiwde Ózbekstanda korrupciyaǵa qarsı keskin gúresiw ilajlarınıń nızamlı tiykarlarınıń jaratılǵanı, bul bolsa xalıqaralıq dárejede tán alınıp atırǵanı ayrıqsha atap ótildi.
Adam sawdası, májbúriy miynet hám sırt elde jumıs islep atırǵan migrantlardıń mashqalaların sheshiwde mámleket unamlı nátiyjelerge eriskeni ayrıqsha atap ótildi.
Bul baǵdarda Ózbekstannıń xalıqaralıq reyting hám indekslerdegi ornı jaqsılanǵanı atap ótildi. Keleshekte de mine, usınday unamlı nátiyjelerge erisiw ushın shólkem menen óz-ara birge islesiwdi bekkemlew máseleleri boyınsha pikir alısıldı.
Tárepler jınayatshılıq hám huqıqbuzarlıqlardıń aldın alıwda zamanagóy málimleme texnologiyalarınan paydalanıw boyınsha birge islesiwdi jedellestiriwge kelisip aldı.

N.Abduraimova,
ÓzA