Respublikamızda medicina tarawında sırt eller menen birge islesiw jumısları jetilistirilip, xalıqtıń salamatlıǵın qorǵaw boyınsha zaman talapları tiykarında jańalıqlar engizilmekte.

Sońǵı jıllarda Ózbekstan Respublikası hám Izrayl mámleketi sırtqı isler ministrliginiń «MASHAV» agentligi arasında birge islesiw jumısları jedel rawajlanbaqta. Ásirese, agentliktiń medicina tarawındaǵı alıp barıp atırǵan keń kólemli jumısları nátiyjesinde jolǵa qoyılǵan joybarları óziniń unamlı nátiyjesin berip atır.
Usınday joybarlar Qaraqalpaqstandaǵı «Mehirli insanlar» fondı tárepinen ámelge asırılıp, akademik Yo.H. Turakulov atındaǵı Respublika qánigelestirilgen endokrinologiya ilimiy-ámeliy medicina orayı Qaraqalpaqstan Respublikası filialı hám Respublika qánigelestirilgen ruwxıy salamatlıq ilimiy-ámeliy medicina orayınıń psixiatriya xızmeti boyınsha Qaraqalpaqstan Respublikası filialına trenajyorlar zalı, mektepke shekemgi balalar oyını xanası, mektep jasındaǵı balalar ushın sabaq tayarlaw, súwret salıw xanası, emlew, dene mádeniyatı xanası (LFK) kerekli buyımlar menen támiyinlendi.
Agentliktiń wákilleri usı medicina mákemelerinde miymanda bolıp, nawqaslarǵa jaratılǵan imkaniyatlar menen tanıstı. Sonday-aq, óz gezeginde nawqaslar hám olardıń ata-anaları da bul jaratılǵan sharayatlardan kewilleri tolıp, kelgen miymanlarǵa óz minnetdarshılıǵın bildirdi.
-Bul jaratılǵan sharayatlar óz gezeginde filialımızda emlenip atırǵan balalardıń tezirek sawalıp ketiwine járdemin tiygizedi,-deydi Respublika qánigelestirilgen ruwxıy salamatlıq ilimiy-ámeliy medicina orayınıń psixiatriya xızmeti boyınsha Qaraqalpaqstan Respublikası filialı direktorı Z.Palwanova.

Qaraqalpaqstan xabar agentligi