Jerge mehir berseń, jer seni baǵadı. Bunı tereń ańǵarǵan jerleslerimiz sońǵı waqıtlarda úy qaptalındaǵı qıytaq jerlerden únemli paydalanıp, ıssıxanalarda qıstıń kúnleri de baw-baǵsha ónimlerin jetistirip, shańaraǵına qosımsha dáramat tappaqta.
Prezidentimizdiń basshılıǵında 2024-jıldıń 28-noyabrinde miywe-palız ónimlerin jetistiriw, qayta islew hám eksporttı kóbeytiw ilajları haqqında ótkerilgen videoselektor májilisinde berilgen wazıypalardıń orınlanıwın támiyinlew maqsetinde Xojeli rayonı «Saymankól» APJ aymaǵındaǵı úlgili qıytaq jer iyesi Allambergen Ubaydullaevtıń shańaraǵında kórgizbeli seminar bolıp ótti.
Seminarǵa Qaraqalpaqstan fermer diyqan xojalıqları hám qıytaq jer iyeleri keńesi baslıǵınıń orınbasarı R.Bekanov, rayonlıq keńesiniń baslıǵı hám xızmetkerleri, máhálle baslıqları, hákim járdemshileri, jaslar jetekshileri hám fermer xojalıqları baslıqları qatnastı. Qatnasıwshılarǵa xalıqtıń qıytaq jerlerden nátiyjeli paydalanıw, sol arqalı dáramat dereklerin jaratıw, sonıń menen birge limon hám basqa da ónimlerdi jetistiriw boyınsha túsinikler berildi.
Bıyılǵı «Qorshaǵan ortalıqtı qorǵaw hám «jasıl» ekonomika jılı» nda rayonda jasıl mákan ortalıǵın jaratıw, qıytaq jerlerden únemli paydalanıw, nál jetistiriw hám xalıqtı bul ilajǵa belsene qatnasıwǵa shaqırıw máseleleri sóz etildi. Bul baǵdardaǵı jumıslarda úlgili qıytaq jer iyeleriniń nátiyjeli jumısları órnek bolatuǵınlıǵı atap ótildi.

Qaraqalpaqstan xabar agentligi