Sońǵı waqıtlarda suwdı únemlew boyınsha alıp barılıp atırǵan keń kólemli jumıslar Nókis rayonı aymaǵında da dawam etpekte. Atap aytqanda, Ózbekstan Respublikası Prezidentiniń 2024-jıl 24-dekabr kúngi 454-sanlı qararına tiykarlanıp, Nókis rayonı aymaǵındaǵı «Aqmańǵıt» kanalınıń 9,5 km aralıǵın rekonstrukciyalaw (betonlaw) belgilengen edi.
Joybardı ámelge asırıw ushın 9,5 mlrd. sum qarjı ajıratılǵan bolıp, búgingi kúnde jumıstı bólip alıp islewshi kárxana tárepinen kerekli texnikalar alıp kelinip, kanaldı betonlaw ushın tayarlaw jumısları alıp barılmaqta.
Nókis rayonındaǵı “Aqmańǵıt” xojalıqlar aralıq kanalı 1963-jılı iske qosılǵan bolıp, ulıwma uzınlıǵı – 9,5 km, ulıwma suw sarıplanıwı – 3,0 m3/sek.tezlikti quraydı.
Bul kanal “Kattaǵar” magistral kanalınan suw alıp, Nókis rayonınıń “Aqmańǵıt,” “Kattaǵar” hám “Darsan” xojalıqları aymaqlarındaǵı xojalıqlardıń qıytaq jer maydanlarına hám 29 fermer xojalıǵınıń jámi 2850 gektar egislik maydanlarına suw jetkerip beredi. Kanaldı betonlaw nátiyjesinde, jıllıq esapta 5 mln 443 metr kub suw únemleniwi názerde tutılmaqta.

Qaraqalpaqstan xabar agentligi