Ózbekstan Respublikasınıń “Rásmiy statistika haqqında»ǵı ǵı Nızamı hám Ózbekstan Respublikası Prezidentiniń 2024-jıl 14-marttaǵı “Ózbekstan Respublikası Prezidenti janındaǵı statistika agentliginiń jumısın shólkemlestiriw ilajları haqqında”ǵı qararı qabıl etilip, statistika uyımları hám isbilermenlik subyektleri arasında óz-ara maǵlıwmat almasıwda málimleme-kommunikaciya texnologiyalarınıń zamanagóy usılların engiziw mexanizmi jetilistirilmekte.
Sonıń menen birge, isbilermenlik subektlerine avtomatlastırılǵan sistema tiykarında olardıń tiykarǵı ekonomikalıq jumıs túri (OKЕD) hám kárxana túri boyınsha (mikrofirma, kishi kárxanalarǵa) óz waqtında xabar beriwdi shólkemlestiriw maqsetinde bir qansha jumıslar alıp barılmaqta.
Isbilermenlik subyektleriniń tiykarǵı ekonomikalıq jumıs túrin (OKЕD) hám kárxana túrin anıqlaw Ózbekstan Respublikası Statistika agentliginiń “Isbilermenlik subyektleriniń tiykarǵı ekonomikalıq jumıs túri hám jıllıq ortasha xızmetkerler sanı haqqında maǵlıwmatlardı jańalaw reglamenti” talapları boyınsha isbilermenlik subyektleri tárepinen usınıs etilgen 1-kb (jıllıq) statistikalıq esabat forması maǵlıwmatları tiykarında, Estat4 avtomatlastırılǵan maǵlıwmatlar sisteması arqalı ámelge asırıladı.
Ózbekstan Respublikası Prezidenti janındaǵı statistika Agentligi tərepinen jaratılǵan statistikalıq maǵlıwmatlar rəsmiy statistika maǵlıwmatı sıpatında jəriyalanadı.
Prezidentimiz hám Húkimetimiz tárepinen kishi isbilermenlik subyektlerin qollap-quwatlaw boyınsha alıp barılıp atırǵan siyasat tásirinde olardıń ekonomikamızdaǵı tutqan ornı anaǵurlım ósti.
2024-jıldıń yanvar-dekabr jaǵdayına kishi isbilermenlik subyektleri tárepinen jalpı aymaqlıq ishki ónimniń 65,8 procenti islep shıǵarıldı. Kishi isbilermenlik subyektleriniń xalıq xojalıǵınıń jetekshi tarawlarındaǵı úlesi de salmaqlı boldı. Yaǵnıy, sanaat óniminde 37,5, qurılısta orınlanǵan jumıslardıń ulıwma kóleminde 86,0, tiykarǵı kapitalǵa kirgizilgen investiciyalarda 27,9, jámi xızmetler tarawında 73,6, avtomobil transportında júk tasıwdıń ulıwma kóleminde 91,6, avtomobil transportı júk aylanısında 89,0, avtomobil transportında jolawshı tasıw xızmetleriniń ulıwma kóleminde 93,2, avtomobil transportında jolawshı aylanısında 96,4, usaqlap satıw sawda aylanısınıń ulıwma kóleminde 97,3, ulıwma eksport kóleminde 34,4, ulıwma import kóleminde 69,7, awıl xojalıǵında 96,3 procentti kuradı.
2025-jıldıń 1-yanvar jaǵdayına hárekettegi kishi kárxana hám mikrofirmalardıń sanı 17 mıń 180 di quradı. Al, 2024-jıldıń yanvar-dekabr aylarında 3102 jańa kishi kárxana hám mikrofirmalar (fermer hám diyqan xojalıqlarısız) shólkemlestirildi.

R.Sharibaev,
Statistika basqarmasınıń Isbilermenlik ortalıǵın baqlaw, isbilermenlikti rawajlandırıw statistikası bóliminiń baslıǵı.
Qaraqalpaqstan xabar agentligi