«Eski Keneges” kanalı betonlanbaqta,-dep xabar bermekte Suw xojalıǵı ministrligi baspasóz xızmeti.

Qaraqalpaqstan Respublikasında bıyılǵı jılǵa belgilengen rejelerge muwapıq, kanallardı rekonstrukciyalaw, betonlaw jumısları baslap jiberildi.
Házirgi waqıtta Taqıyatas rayonındaǵı “Eski Keneges” kanalın rekonstrukciyalaw jumısları qızǵın alıp barılmaqta. Bul jumıslar “VORIS CHINA” juwapkershiligi sheklengen jámiyeti túrindegi qospa kárxananıń qurıwshıları tárepinen ámelge asırılmaqta. Búgingi kúnge shekem obyekttiń 1,44 kilometrlik bóleginde topıraq jumısları hám 0,5 kilometrlik bóleginde betonlaw jumısları ámelge asırıldı.
– Bul kanaldı betonlaw jumısların ámelge asırıwdan aldın joybarın islep shıǵıwda bir qatar áhmiyetli tárepleri inabatqa alındı,-deydi Taqıyatas rayonı “Suw jetkeriw xızmeti” MK direktorı Á.Nazarov. – Aldınları aymaqtaǵı ayırım fermerlerdiń egislik maydanları kanaldaǵı suwdan biraz joqarıda bolǵanlıǵı sebepli qosımsha nasos agregatların iske qosıwǵa tuwra keletuǵın edi. Kanaldı toltırıp qoyıw ushın artıqsha suw, nasoslar ushın kóp muǵdarda energiya jumsalatuǵın edi. Betonlaw boyınsha joybar islep shıǵılıp atırǵanda usı sıyaqlı mashqalalardı aytıp, usınıslarımızdı berdik. Nátiyjede, joybar boyınsha topıraqtıń kólemi kóterilip, kanaldaǵı az suw menen de kóplegen fermerlerdiń atızları kanaldıń óz aǵısı menen de suwǵarılatuǵın boladı.
Rekonstrukciyalaw sheńberinde fermerlerdiń suw alıw orınları hám gidroqurılmalar birotala ońlanıp barılmaqta. Kanaldaǵı betonlaw jumısları juwmaǵına jetkeninde, suwdıń ısırapkershiligi azayıwı menen birge, aymaqtaǵı 7 mıń gektardan aslam egislik jerdiń suw menen támiyinleniwi jaqsılanadı.
Maǵlıwmat ushın, Ózbekstan Respublikası Ministrler Kabinetiniń tiyisli qararına tiykarlanıp, bıyılǵı jılı Qaraqalpaqstan Respublikasında 39,8 kilometrlik uzınlıqtaǵı 4 kanaldı rekonstrukciyalaw, betonlaw rejelestirilgen. Házirgi waqıtta qalǵan 3 kanalda da topıraq hám betonlawǵa tayarlaw jumısları baslanǵan.

Qaraqalpaqstan xabar agentligi