Ázerbayjan Milliy Majlisi májilisinde «Ázerbayjan Respublikası, Qazaqstan Respublikası hám Ózbekstan Respublikası arasında jasıl energiyanı rawajlandırıw hám jetkerip beriw boyınsha strategiyalıq sheriklik haqqındaǵı kelisim»di tastıyıqlaw haqqındaǵı nızam joybarı dodalandı. Bul haqqında AzerTAJ xabar berdi.

Ótken jılı noyabr ayında Bakude bolıp ótken BMSh Klimat ózgeriwi boyınsha konvenciyası 29-sessiyası (SOP29) sheńberinde úsh mámleket basshıları tárepinen qol qoyılǵan bul hújjet energetika tarawında birge islesiwdiń jańa strategiyalıq tiykarların anıqlaw maqsetinde tayarlanǵan.
– Bul kelisim jasıl hám qayta tiklenetuǵın energiya dereklerin rawajlandırıw, energiya qáwipsizligin támiyinlew hám turaqlı rawajlanıw maqsetlerine úles qosıw jolındaǵı áhmiyetli qádem bolıp tabıladı, – delingen Ázerbayjannıń jetekshi málimleme agentliginiń xabarında.
Shártnamanıń jáne bir tiykarǵı maqseti Parij klimat kelisiminde názerde tutılǵan ıssıxana gaziniń shıǵındısın azaytıw maqsetine muwapıq, jasıl energiyanı rawajlandırıwǵa járdemlesiw bolıp tabıladı.
– Joybar kúshke kirse, Oraylıq Aziya hám Qubla Kavkaz energetika sistemasınıń integraciyasın kúsheytiw arqalı qayta tiklenetuǵın energiyanı Evropa hám basqa da regionlar bazarına qaratıw imkaniyatı keńeyedi, – dep pikirin dawam ettiredi maqala avtorı.
Baslamanı turmısqa engiziw maqsetinde tiykarǵı orınlawshılar – «Ózbekstan milliy elektr tarmaqları» AJ, «Ázerenerji» AAJ hám «Qazaqstan elektr tarmaqların basqarıw kompaniyası» AJ qatnasıwında «Jasıl koridor birlespesi» birgeliktegi kárxanası shólkemlestirildi. Bul jámáát texnikalıq-eknomikalıq tiykarlardı tayarlaw hám joybardı ámelge asırıwǵa baylanıslı zárúr jumıslardı atqaradı.
Sheksiz múddetke dúzilgen shártnama tárepler arasındaǵı kóp jıllıq birge islesiw arqalı turaqlı rawajlanıw maqsetlerin bunnan bılay da nátiyjeli ámelge asırıwǵa xızmet etedi.
Sebebi, «ÁzerTAJ» Ózbekstannıń geostrategiyalıq ornalasıwı bunday birgeliktegi joybarlar ushın qolaylı imkaniyat jaratatuǵınına ayrıqsha itibar qaratqan.
Dodalawdan soń Milliy Majlis tárepinen nızam joybarı tastıyıqlanǵan.

M.Sayfullaev,
ÓzAnıń xabarshısı