Ózbekstan hám Malayziya arasında joqarı bilimlendiriw tarawında birge islesiwdi rawajlandırıwǵa qaratılǵan birinshi bilimlendiriw forumı óz jumısın basladı. Bul áhmiyetli ilaj Ózbekstan hám Malayziyanıń joqarı oqıw orınları arasındaǵı akademiyalıq hám ilimiy birge islesiwdi bunnan bılay da bekkemlewge xızmet etedi.

Forumda Ózbekstannıń abıraylı joqarı bilimlendiriw mákemeleriniń basshıları, sonday-aq, Malayziyanıń jetekshi universitetleriniń wákilleri qatnaspaqta. Ilaj sheńberinde tárepler joqarı bilimlendiriw sistemasındaǵı zamanagóy qatnasıqlar, ilimiy izertlewler hám akademiyalıq almasıw baǵdarlamaları boyınsha pikir alıspaqta.
Bul forumda Berdaq atındaǵı Qaraqalpaq mámleketlik universiteti rektorı, akademik A.Reymov ta qatnaspaqta. Forum universitettiń xalıqaralıq baylanısların jáne de keńeytiw, studentlerge hám professor-oqıtıwshılarǵa jańa imkaniyatlar jaratıw jáne ilimiy birge islesiwdi bekkemlew jolında baslı qádem bolıp esaplanadı.
Forum sheńberinde Ózbekstan hám Malayziyanıń joqarı oqıw orınları arasında bir qatar áhmiyetli hújjetlerge, sonıń ishinde, birge islesiw shártnamaları hám memorandumlarǵa qol qoyıldı. Bul hújjetler ilimiy izertlewlerdi qollap-quwatlaw, professor-oqıtıwshılar hám studentler almasıwı, birgeliktegi bilimlendiriw baǵdarlamaların ámelge asırıw sıyaqlı baǵdarlardı qamtıp aladı.
Ózbekstan hám Malayziya arasındaǵı bilimlendiriw tarawındaǵı birge islesiwdiń kúsheyiwi tek ǵana bilimlendiriwdiń sapasın arttırıw emes, al xalıqaralıq kólemde ilimiy baylanıslardı bekkemlewge xızmet etedi. Forum nátiyjesinde erisilgen kelisimler eki mámleket bilimlendiriw sistemasınıń integraciyasına, bilimlendiriw mákemeleri arasındaǵı tájiriybe almasıwdıń jáne de jedellesiwine túrtki boladı.

Madina Jumabaeva,
QMU Qaraqalpaq filologiyası hám jurnalistika
fakultetiniń 2-kurs studenti.
Qaraqalpaqstan xabar agentligi